માત્ર મોંઘા શેમ્પૂથી નહીં જાય ડેન્ડ્રફ! અપનાવો 4 ઘરગથ્થુ ઉપાય, વાળની સમસ્યા થશે દૂર

શિયાળાની ઠંડી હવા સાથે વાળ અને ત્વચાની સમસ્યાઓ વધવા લાગે છે, જેમાં ડેન્ડ્રફ (ખોડો) સૌથી સામાન્ય અને પરેશાન કરનારી સમસ્યા છે.

માથામાં સતત ખંજવાળ, વાળ ખરવા અને ખભા પર દેખાતા સફેદ કણો ઘણીવાર શરમજનક સ્થિતિ ઊભી કરે છે. જો મોંઘા એન્ટી-ડેન્ડ્રફ શેમ્પૂ બદલ્યા છતાં રાહત ન મળી હોય, તો કેટલાક સરળ અને સુરક્ષિત ઘરેલું ઉપચારથી ડેન્ડ્રફને જડમૂળમાંથી ઘટાડવો શક્ય છે. આ હેર માસ્ક સ્કેલ્પને સ્વસ્થ બનાવીને ખોડાથી કાયમી રાહત અપાવવામાં મદદ કરે છે.

1. દહીં અને લીંબુનો માસ્ક
દહીંમાં રહેલું લેક્ટિક એસિડ અને પ્રોબાયોટિક્સ સ્કેલ્પનું pH સંતુલિત રાખે છે, જ્યારે લીંબુના એન્ટી-ફંગલ ગુણ ડેન્ડ્રફને નિયંત્રિત કરે છે. આ માસ્ક બનાવવા માટે 3 ચમચી તાજા દહીંમાં અડધા લીંબુનો રસ મિક્સ કરો. આ મિશ્રણને સ્કેલ્પ અને વાળમાં મૂળથી છેડા સુધી લગાવી 30 મિનિટ રાખો. પછી હળવા શેમ્પૂથી વાળ ધોઈ લો. સપ્તાહમાં બે વખત ઉપયોગ કરવાથી ખોડો ઘટે છે અને વાળમાં કુદરતી ચમક આવે છે.

2. લીમડો અને આમળાનો માસ્ક
લીમડો તેના એન્ટી-બેક્ટેરિયલ અને એન્ટી-ફંગલ ગુણો માટે ઓળખાય છે, જ્યારે આમળા સ્કેલ્પને પોષણ આપે છે અને ખોડાને જડમૂળમાંથી દૂર કરવામાં મદદ કરે છે. તાજા લીમડાના પાંદડા પીસીને પેસ્ટ બનાવો, તેમાં 2 ચમચી આમળાનો પાવડર અને થોડું ગુલાબજળ ઉમેરો. આ પેસ્ટ સ્કેલ્પ પર લગાવી 40 મિનિટ રાખો અને પછી પાણીથી ધોઈ લો. આ ઉપચાર ખંજવાળમાં તરત રાહત આપે છે.

3. એપલ સિન્ડર વિનેગર અને મધનો માસ્ક
એપલ સિન્ડર વિનેગરમાં રહેલું એસિટિક એસિડ સ્કેલ્પના મૃત કોષો અને વધારાનું તેલ દૂર કરે છે, જ્યારે મધ કુદરતી મોઇશ્ચરાઇઝર તરીકે કામ કરે છે. 2 ચમચી એપલ સિન્ડર વિનેગરમાં 1 ચમચી મધ મિક્સ કરો અને આ મિશ્રણ સીધું સ્કેલ્પ પર લગાવો. 20 મિનિટ પછી ઠંડા પાણીથી ધોઈ લો. આ માસ્ક સ્કેલ્પને સ્વચ્છ બનાવી ડેન્ડ્રફ ઝડપથી ઘટાડે છે.

4. કેળું અને ઓલિવ ઓઇલનો માસ્ક
કેળામાં રહેલા વિટામિન્સ અને મિનરલ્સ સ્કેલ્પને પોષણ આપે છે, જ્યારે ઓલિવ ઓઇલ ખંજવાળ ઘટાડે છે. 1 પાકા કેળાને મેશ કરીને તેમાં 1 મોટો ચમચો ઓલિવ ઓઇલ ઉમેરો. આ મિશ્રણ સ્કેલ્પ અને વાળમાં લગાવી 45 મિનિટ રાખો અને પછી ધોઈ લો. આ માસ્ક ખોડાને નિયંત્રિત કરવાની સાથે વાળને નરમ અને ચમકદાર બનાવે છે.

આ સરળ ઘરેલું ઉપચાર નિયમિત અપનાવવાથી શિયાળામાં પણ સ્કેલ્પ સ્વસ્થ રહેશે અને ડેન્ડ્રફની સમસ્યા ધીમે-ધીમે દૂર થતી જશે.