કેળાની છાલથી બનાવો નેચરલ ફેસ પેક, ત્વચા બનશે ગ્લોઇંગ અને સોફ્ટ

શિયાળાની ઋતુમાં હવામાં ભેજનું પ્રમાણ ઘટી જતાં ત્વચા પર તેની સીધી અસર જોવા મળે છે, જેના કારણે સ્કિન ડલ, રૂખી અને બેઝાન દેખાવા લાગે છે.

આવી સ્થિતિમાં લોકો ત્વચાને ચમકદાર અને સ્વસ્થ રાખવા માટે મોંઘા બ્યુટી પ્રોડક્ટ્સનો સહારો લે છે, પરંતુ તેમાં રહેલા કેમિકલ્સ ઘણીવાર ફાયદાની જગ્યાએ ત્વચાને નુકસાન પહોંચાડે છે. જો તમે પણ કુદરતી રીતે સ્કિન કેર કરવા માંગતા હો, તો તમારા રસોડામાં સરળતાથી મળતી કેળાની છાલ એક ઉત્તમ વિકલ્પ બની શકે છે. સામાન્ય રીતે કેળું ખાઈને આપણે તેની છાલ ફેંકી દઈએ છીએ, પરંતુ હકીકતમાં આ છાલ ત્વચા માટે બહુ જ લાભદાયી છે. કેળાની છાલમાં રહેલા વિટામિન્સ, મિનરલ્સ અને શક્તિશાળી એન્ટીઓકિસડન્ટ ત્વચા પર જામી ગયેલી ગંદકી, ડેડ સ્કિન અને ફ્રી રેડિકલ્સને દૂર કરવામાં મદદ કરે છે, જેના કારણે સ્કિન કુદરતી રીતે ગ્લોઇંગ અને હેલ્ધી દેખાવા લાગે છે.

કેળાની છાલમાંથી બનેલો નેચરલ ફેસ પેક ત્વચાની ટેનિંગ અને પિગ્મેન્ટેશન ઘટાડવામાં પણ અસરકારક માનવામાં આવે છે. નિયમિત રીતે આ ફેસ પેક લગાવવાથી ત્વચાના મૃત કોષો સરળતાથી દૂર થાય છે, જેના કારણે ચહેરો વધુ બ્રાઇટ, નરમ અને સ્વચ્છ લાગે છે. આ ફેસ પેક બનાવવાની રીત પણ ખૂબ સરળ છે. સૌપ્રથમ બે કેળા લો અને તેની છાલને સારી રીતે ધોઈ લો, જેથી તેમાં રહેલી ગંદકી કે કેમિકલ દૂર થઈ જાય. હવે આ છાલને નાના ટુકડાઓમાં કાપીને મિક્સરમાં પીસી લો. તેમાં એક ચમચી મધ અને અડધી ચમચી ગુલાબજળ ઉમેરો અને એક સુંવાળી પેસ્ટ તૈયાર કરો. મધ ત્વચાને અંદરથી મોઇશ્ચર આપે છે અને ડ્રાઇનેસ દૂર કરે છે, જ્યારે ગુલાબજળ ત્વચાને ઠંડક આપે છે અને ખુલ્લા પોર્સને ટાઈટ કરવામાં મદદરૂપ થાય છે, જેના કારણે સ્કિન વધુ ફ્રેશ દેખાય છે.

આ ફેસ પેક લગાવતાં પહેલાં ચહેરાને સ્વચ્છ પાણીથી ધોઈને હળવા હાથથી લુછી લો, જેથી ત્વચા પરની ધૂળ-મેલ દૂર થઈ જાય. ત્યારબાદ આ પેસ્ટને હળવા હાથથી ચહેરા અને ગરદન પર સમાન રીતે લગાવો અને લગભગ 20 મિનિટ સુધી સૂકવવા દો. ફેસ પેક સૂકાઈ જાય પછી ચહેરાને સ્વચ્છ પાણીથી ધોઈ લો અને અંતમાં હળવું મોઇશ્ચરાઇઝર લગાવો. કેળાની છાલથી બનેલા આ ફેસ પેકના નિયમિત ઉપયોગથી ચહેરાની ડ્રાઇનેસ ઓછી થાય છે, ત્વચા લાંબા સમય સુધી સ્વસ્થ રહે છે અને કુદરતી રીતે ચમકદાર તથા સોફ્ટ બને છે. જો તમે કેમિકલથી દૂર રહીને નેચરલ સ્કિન કેર અપનાવા માંગતા હો, તો કેળાની છાલનો આ ઘરેલું ફેસ પેક તમારા માટે એક સરળ અને અસરકારક ઉપાય બની શકે છે.