અંકલેશ્વર: દિલ્હી-મુંબઇ એક્સપ્રેસ વે પર પુનગામ નજીકથી રૂ.2 કરોડની કિંમતનો વિદેશી દારૂ ઝડપાયો, ટ્રકમાં ચોખાની ગુણની આડમાં કરાતી હતી હેરાફેરી

અંકલેશ્વર ગ્રામ્ય પોલીસે દિલ્હી મુંબઈ એક્સપ્રેસ વે પર પુનગામ નજીકથી વિદેશી દારૂ ભરેલ ટ્રક ઝડપી પાડી હતી.પોલીસે ચોખાની ગુણની આડમાં સંતાડીને લઇ જવાતા રૂ.2 કરોડથી વધુની કિંમતના દારૂના જથ્થા સાથે ટ્રકના ડ્રાઇવર અને ક્લીનરની ધરપકડ કરી છે.

અંકલેશ્વરના પુનગામ નજીક દિલ્હી–મુંબઇ એક્સપ્રેસ વે પર ગ્રામ્ય પોલીસે મોટી કાર્યવાહી કરીને વિદેશી દારૂનો જથ્થો ઝડપી પાડ્યો છે. ટ્રકમાં ચોખાની ગુણની આડમાં સંતાડી લઈ જવાતો રૂ. 2.6 કરોડની કિંમતનો વિદેશી દારૂ કબ્જે કરવામાં આવ્યો છે.પોલીસને મળેલી બાતમીના આધારે ટ્રકને રોકી તપાસ કરતાં અંદરથી 33 હજાર નંગ વિદેશી દારૂની બોટલો મળી આવી હતી.

દારૂ ચોખાની બોરીઓ વચ્ચે છુપાવીને લઈ જવાતો હતો જેથી ચેકિંગ દરમિયાન શંકા ન જાય.ગ્રામ્ય પોલીસે રાજસ્થાનના ટ્રક ડ્રાઇવર જેરામ મેગવાલ અને ક્લીનર મુકેશ મેગવાલની ધરપકડ કરી છે. ટ્રક અને ચોખા સહિત કુલ રૂ. 2.24 કરોડની કિંમતનો મુદ્દામાલ જપ્ત કરવામાં આવ્યો છે.

પ્રાથમિક તપાસમાં સામે આવ્યું છે કે દારૂ હરિયાણા બોર્ડર પરથી ભરવામાં આવ્યો હતો અને વાંસદ ટોલનાકા સુધી પહોંચાડવાનો હતો. પોલીસથી બચવા માટે આરોપીઓએ દિલ્હી–મુંબઇ એક્સપ્રેસ વેનો માર્ગ પસંદ કર્યો હોવાનું બહાર આવ્યું છે. ગ્રામ્ય પોલીસે પ્રોહીબિશન અંગેનો ગુનો નોંધી વધુ તપાસ હાથ ધરી છે.