ગાંધીનગર : રાજકોટના યુવાનોએ બનાવ્યું પોર્ટેબલ ઓક્સિજન કોન્સન્ટ્રેટર મશીન, મુખ્યમંત્રીએ કર્યું મશીનનું નિદર્શન

કોરોનાની પ્રવર્તમાન પરિસ્થિતીમાં વધુ સંક્રમિત દર્દીઓની સારવાર માટે ઓક્સિજનની જરૂરિયાત સ્થાનિક સ્તરે પૂરી કરી શકાય તેવી અભિનવ પહેલ રાજકોટના યુવા સાહસિકોએ કરી છે. આ યુવાઓએ પ્રાયોગિક ધોરણે પોર્ટેબલ ઓક્સિજન કોન્સન્ટ્રેટર મશીન બનાવ્યું છે. આ મશીનનું ફેરબી ટેકનોલોજીથી રશિયન સ્ટાટર્ન્ડડ મુજબના ટેસ્ટિંગ અને અન્ય જરૂરી મંજૂરીઓ મેળવી પ્રાયોગિક ધોરણે ટ્રાયલ રન પણ શરૂ કરવામાં આવશે.

ગાંધીનગર ખાતે રાજ્યના મુખ્યમંત્રી વિજય રૂપાણી સમક્ષ આ પોર્ટેબલ ઓક્સિજન કોન્સન્ટ્રેટર મશીનનું નિદર્શન કરતાં મુકેશ વીરડિયાએ જણાવ્યું હતું કે, 10 લીટર પ્રતિ મિનીટનો ઓક્સિજન ફ્લો ધરાવતું આ મશીન પ્લગ એન્ડ પ્લે-પોર્ટેબલ છે. જેના દ્વારા એક સાથે 2 દર્દીઓને સારવાર આપી શકાય તે માટે 2 ફ્લો ધરાવતું આ મશીન બનાવવામાં આવ્યું છે. આ પોર્ટેબલ ઓક્સિજન કોન્સન્ટ્રેટર મશીનમાં શ્વાસમાં ભેજ આવતો ન હોવાથી ભેજજન્ય અન્ય રોગ કે, મ્યુકોરમાઇકોસીસ જેવા રોગની સંભાવના આ મશીનના ઉપયોગ બાદ નહિવત રહે છે.

જેને પ્રાયોગિક ધોરણે 3 દિવસ માટે ટેસ્ટીંગ કર્યા બાદ હવે રશિયન સ્ટાર્ન્ડડ પ્રમાણેના ટેસ્ટિંગ અને અન્ય જરૂરી મંજૂરીઓ મેળવ્યા બાદ ફાઇનલ પ્રોડક્ટ ટ્રાયલ રન માટે તબીબોને આપવામાં આવશે. રાજ્યના મુખ્યમંત્રી વિજય રૂપાણીએ યુવાઓના આ સિદ્ધિ બદલ અભિનંદન પાઠવ્યા હતા. મુખ્યમંત્રીએ નિદર્શન નિહાળ્યા બાદ તેમને જરૂરી મંજૂરીઓ મેળવવામાં રાજ્ય સરકાર માર્ગદર્શન આપશે તેમ યુવા સાહસિકોને પ્રોત્સાહિત કરતા જણાવ્યું હતું.