સરદાર સરોવર નર્મદા ડેમના 9 ગેટ ખોલાયા, 1.50 લાખ ક્યુસેક પાણી નદીમાં ઠલવાયુ

ગુજરાતની જીવાદોરી સમાન સરદાર સરોવર નર્મદા ડેમની જળ સપાટીમાં ધરખમ વધારો થયો છે. નર્મદા ડેમે  સિઝનમાં પ્રથમ વખત 134.75 મીટરની સપાટી વટાવી છે. ઉપરવાસમાંથી 3,60, 629 ક્યુસેક પાણીની આવક થઈ રહી છે. જેના પગલે સરદાર સરોવર નર્મદા ડેમના નવ ગેટ ખોલી દેવામાં આવ્યા છે અને તેમાંથી 1,50,000 ક્યુસેક પાણી નર્મદા નદીમાં ઠાલવવામાં આવી રહ્યું છે. નર્મદા નદીમાં પાણી છોડવામાં આવતા નદીકાંઠાના વિસ્તારમાં એલર્ટ આપવામાં આવ્યું છે. નર્મદા, ભરૂચ અને વડોદરા જિલ્લાના કાંઠા વિસ્તારના ગામના લોકોને નદીના પટમાં ન જવાની સૂચના આપી દેવામાં આવી છે. સરદાર સરોવર નર્મદા ડેમમાં હાલ પાણીનો 3823 મિલિયન ક્યુબિક મીટર જથ્થો છે તો નર્મદા ડેમ 87%થી વધુ ભરાયો છે.