સાબરકાંઠા જિલ્લાના ઇડર તાલુકાના રાઓલ ગામમાં કાળો જાદુ બતાવી રૂપિયાનો વરસાદ કરતાં તાંત્રિક ઝડપાયો છે. લોકો સાથે છેતરપિંડી કરતા તાંત્રિકની જાદર પોલીસે અટકાયત કરી કાયદેસરની કાર્યવાહી હાથ ધરી છે.

હજુ એ લોકો અંધશ્રદ્ધાના નામે છેતરાઈ રહ્યા છે, ત્યારે આવો જ એક કિસ્સો સાબરકાંઠા જિલ્લામાંથી સામે આવ્યો છે. અંધશ્રદ્ધા નામે અનેક લોકો છેતરપિંડીનો ભોગ બનતા હોય છે. તેવામાં સાબરકાંઠાના જાદર પોલીસ સ્ટેશનની હદમાં આવેલા રાઓલ ગામમાં કાળો જાદુ બતાવી લોકો સાથે છેતરપિંડી કરતા તાંત્રિકની જાદર પોલીસે ધરપકડ કરી છે. જાદર પોલીસ મથક ખાતે હિંમતનગર તાલુકાના પાણપુર ગામના વ્યક્તિએ ફરિયાદ નોંધાવી હતી, અને ત્યારબાદ પોલીસે તપાસ હાથ ધરી હતી. જોકે, જાદર પોલીસે વધુ તપાસ કરતાં અન્ય ભોગ બનનાર પણ સામે આવ્યા હતા. જોકે, તાંત્રિક અલ્પેશ ઠાકોરની પોલીસે ધરપકડ કરી લીધી છે.

જોકે, અંધશ્રદ્ધાના નામે લોકો સાથે છેતરપિંડી કરતો તાંત્રિક અલ્પેશ ઠાકોર તાજેતરમાં જ રાઓલ ગામના સરપંચ તરીકે ચૂંટાઈ આવ્યો છે. 21મી સદીમાં હજુ પણ અનેક લોકો અંધશ્રદ્ધા અને વગર મહેનતે પૈસાદાર થવાની લાલચ રાખે છે, આખરે છેતરપિંડીનો ભોગ બનતા હોય છે, ત્યારે તોફિક સારોલીયા પાસેથી તાંત્રિક વિધિ કરી અને રૂપિયાનો વરસાદ કરાવવાની લાલચ આપી 11 લાખ રૂપિયાની છેતરપિંડી સામે આવી છે. આ સાથે જ વડાલીના સગર સમાજના અન્ય 2 લોકો પણ આ લાલચનો ભોગ બન્યા છે. જેમાં તાંત્રિક અલ્પેશ ઠાકોરે આ વ્યક્તિઓ પાસેથી અલગ અલગ નાણા પડાવી લીધા છે. એટલું જ નહીં, ભોગ બનનાર લક્ષ્મણ સગરે પોતાની જમીન વેચી સાથોસાથે બહેન અને માતાના દાગીના પણ વેચીને તાંત્રિક અલ્પેશ ઠાકોરને રૂપિયા ધર્યા હતા. તાંત્રિક અલ્પેશ ઠાકોરે કરોડપતિ બનાવવાના સપના બતાવ્યા હતા. તે સપના ઉપર પાણી ફરી વળ્યું હતું. તો અન્ય વડાલીના જ રહેવાસી રાજેન્દ્ર સગર પણ આવી જ રીતે લોભામણી લાલચનો ભોગ બની 32 લાખ રૂપિયા તાંત્રિક અલ્પેશ ઠાકોરને આપી છેતરાયા હતા. જોકે, આ ભોગ બનનાર વ્યક્તિઓની ફરિયાદના આધારે જાદર પોલીસે તાંત્રિક અલ્પેશ ઠાકોર વિરુદ્ધ ગુન્હો દાખલ કરવા સાથે ધરપકડ કરી કાયદેસરની કાર્યવાહી હાથ ધરી છે. કર્યો છે.

અત્રે ઉલ્લેખનીય છે કે, સરપંચ તરીકે ચૂંટાયેલા તાંત્રિક અલ્પેશ ઠાકોર હજુ તો ગ્રામ પંચાયતના સરપંચ તરીકેનો ચાર્જ પણ સંભાળ્યો નથી. તેવામાં જ પોલીસે તેની ધરપકડ કરી લીધી છે. તાંત્રિક વિધિના નામે લોકો સાથે છેતરપિંડી આચરી હોવાની ફરિયાદના આધારે પોલીસે હાલ તો ગુનો દાખલ કરી તપાસનો ધમધમાટ શરૂ કર્યો છે. જોકે આ તાંત્રિક દ્વારા હજુ કેટલા લોકો સાથે છેતરપિંડી આચરવામાં આવી છે, તે દિશામાં પણ પોલીસ દ્વારા તપાસ હાથ ધરવામાં આવી છે.