ભાવનગર શહેરના સરિતા સોસાયટી વિસ્તારમાં વર્ષ 2001માં થયેલી ઘરફોડ ચોરીના ગુન્હામાં એક આરોપી આખરે 24 વર્ષ બાદ પોલીસના હાથે ઝડપાયો છે. જોકે, આટલા વર્ષોની શોધખોળ બાદ પોલીસને આખરે ગુન્હાનો ભેદ ઉકેલવામાં સફળતા મળી છે.

મળતી માહિતી અનુસાર, વર્ષ 2001માં ભાવનગરના સરિતા સોસાયટી વિસ્તારમાં આવેલ બંધ દુકાનમાં 2 ઈસમોએ તાળા તોડી ચોરીને અંજામ આપ્યો હતો. આ ઘટનાની ફરિયાદ બાદ પોલીસે એક આરોપીને ઝડપી લીધો હતો. પરંતુ બીજો આરોપી ફરાર થઇ ગયો હતો, ત્યારે 24 વર્ષ બાદ પોલીસે આરોપી મુકેશ વલ્લભ ચોથાણીને પકડી પાડ્યો છે.

મૂળ જૂનાગઢનો અને હાલ સુરતમાં વસવાટ કરતો મુકેશ ચોથાણી ચોરી બાદ પોતાનું સરનામું બદલી છુપાઈ ગયો હતો, ત્યારે પોલોસે  ટેકનિકલ સર્વેલન્સ અને જૂની ફાઈલ્સ પર આધારિત માહિતીના આધારે આરોપીની ઓળખ કરી તેને સુરતથી ઝડપી પાડ્યો છે, ત્યારે હાલ તો પોલીસે આરોપી વિરુદ્ધ કાયદેસરની કાર્યવાહી હાથ ધરી છે.

અત્રે ઉલ્લેખનીય છે કે, 24 વર્ષની શોધખોળ બાદ પોલીસને આખરે આરોપી હાથ લાગ્યો છે, ત્યારે ઉકેલાયેલો આ ભેદ ભવિષ્યમાં પણ આ પ્રકારના ગુન્હા આચરતા ગુનાહિત તત્વો માટે કડક સંદેશ આપી શકે છે.