અરવલ્લી: ટીંટોઈની હાઇસ્કૂલ સંપૂર્ણપણે થઈ ડિજિટલ, વિદ્યાર્થીઓ માટે શિક્ષણના અનેક નવા દ્વાર ખૂલ્યા

ડિજિટલ ઇન્ડિયાના કદમ હેઠળ હવે ગામડાઓની શાળાઓ પણ ડિજિટલ બની રહી છે ત્યારે સામાજિક આગેવાનો પણ આ મુહિમમાં જોડાયા છે અને અરવલ્લીના ટીંટોઈની હાઇસ્કૂલને સંપૂર્ણ ડિજિટલ કરી વિદ્યાર્થીઓ માટે અનેક નવા શિક્ષણના દ્વાર ખોલી દીધા છે.

અરવલ્લી જિલ્લાના મોડાસાના ટીંટોઈમાં આવેલી શ્રી પી એમ કોઠારી હાઈસ્કૂલ વિસ્તારના 25 ગામોના લોકો માટે શિક્ષણનું ધામ છે.મોડાસાથી શામળાજી વચ્ચે આવેલ આ શિક્ષણ ધામમાં શિક્ષણ આજથી ડિજિટલ થઇ ચૂક્યું છે.ટીંટોઈ એજ્યુકેશન મડંળ દ્વારા કરાયેલા આયોજનમાં શાળામાં અભ્યાસ કરેલા તેમજ ગામના આગેવાનોના સહયોગથી શાળાને ડિજિટલ બનાવવાનું બીડું ઝડપ્યું હતું.

જિલ્લા કલેકટર પ્રશસ્તિ પારિક તેમજ સામાજિક અગ્રણીઓની હાજરીમાં 24 ડિજિટલ સ્ક્રીન ધરાવતા વર્ગખંડો ખુલ્લા મુકાયા હતા.આ વર્ગખડોની ખાસિયત એ હતી કે ધોરણ 1 થી લઇ ધોરણ 12 સુધીના વિદ્યાર્થીઓ ડિજિટલ શિક્ષણ મેળવી શકશે.મોબાઈલ તેમજ ઇન્ટરનેટ યુગમાં વાઇફાઇ ઝોન બનાવી સંપૂર્ણ શાળાને સ્માર્ટ શાળા બનાવી દેવામાં આવી છે.શિક્ષણને ઉચ્ચ સ્તરે લઇ જવાના ભગીરથ પ્રયાસથી વિસ્તારના 25 જેટલા ગામડાઓના વિદ્યાર્થીઓને ફાયદો થશે.

ટીંટોઈ ગામ 10 હજારની વસ્તી ધરાવતું ગામ છે.સામાન્ય રીતે રાજ્ય સરકાર પોતાની કેટલીકે મોડેલ શાળાઓને સ્માર્ટ શાળા બનાવે છે પણ કોઈ મંડળ દ્વારા શાળાને ડિજિટલ બનાવવાની મહેનત રંગ લાવી છે.ગામના અગ્રણીઓ દ્વારા ગામને ઉચ્ચ સ્તરે લઇ જવા માટે તેમજ શિક્ષણમાં ગુણવત્તા વધારવાતાં પ્રયાસો જાતેજ કરવાના પ્રયાસથી સાચા અર્થમાં સામાજિક સુધારા થઇ શકે છે..જિલ્લા કલેકટર દ્વારા પણ આ પ્રયાસને બિરદાવવામાં આવ્યો હતો...