અંકલેશ્વર: ક્રાઇમ બ્રાન્ચે યોગી એસ્ટેટના ગોડાઉનમાંથી અનઅધિકૃત કેમિકલનો જથ્થો ઝડપી પાડ્યો, રૂ.54 લાખનો મુદ્દામાલ જપ્ત

ભરૂચ એલસીબીએ અંકલેશ્વરની યોગી એસ્ટેટમાં આવેલ ગોડાઉનમાંથી કેમિકલનો ગેરકાયદેસર રીતે સંતાડેલ જથ્થો અને ટેન્કર મળી 54.52 લાખનો મુદ્દામાલ સહિત એકને ઝડપી પાડ્યો હતો.

અંકલેશ્વરના જીતાલી ગામ પાસેના યોગી એસ્ટેટમાં આવેલ ખુશ્બુ ડાય કેમ પ્રાઇવેટ લિમિટેડ કંપનીના ગોડાઉનમાં અત્યંત જવલનશીલ કેમિકલ્સનો ગેરકાયદેસર રીતે જથ્થો અસુરક્ષિત અને ભયજનક રીતે રાખેલ છે. અને હાલ એક ટેન્કરમાંથી પાઇપ વડે બેરલો ભરી ગોડાઉનમાં સ્ટોર કરવાની પ્રવૃત્તિ ચાલે છે. જેવી બાતમીના આધારે ભરૂચ એલસીબીની ટીમે રેડ કરી હતી.

પોલીસે સ્થળ પરથી લોખંડ અને પ્લાસ્ટિકના 298 નંગ બેરલો તેમજ ટેન્કરમાં રહેલ 50.510 લીટર કેમિકલ્સ અને 144 ખાલી બેરલ મળી આવ્યા હતાં.પોલીસે 33.32 લાખનું કેમિકલ્સ અને અન્ય સામગ્રી મળી કુલ 54.52 લાખનો મુદ્દામાલ કબ્જે કર્યો હતો.અને ભડકોદ્રાના આદિત્ય નગર ખાતે રહેતો અક્ષય નટવર પરમારને ઝડપી પાડ્યો હતો.જ્યારે અશોક મણિલાલ ડંડ,ઊર્મિલા ડંડને વોન્ટેડ જાહેર કર્યા હતા.