ભરૂચ : વી.સી.ટી. મહિલા આર્ટ્સ એન્ડ કોમર્સ કોલેજ ખાતે આંતર કોલેજ રસ્સા ખેંચ સ્પર્ધા યોજાય...

• વી.સી.ટી. મહિલા આર્ટ્સ એન્ડ કોમર્સ કોલેજ દ્વારા આયોજન

• બહેનો માટે આંતર કોલેજ રસ્સા ખેંચ સ્પર્ધાનું આયોજન કરાયું

• રમત વિકાસ અધિકારી રાજનસિંહ ગોહિલ રહ્યા વિશેષ ઉપસ્થિત

• VNSGU સંલગ્ન દ. ગુજરાતની 17 કોલેજની ટીમોએ ભાગ લીધો

• સ્પર્ધામાં મોટી સંખ્યામાં વિદ્યાર્થીનીઓએ ઉત્સાહભેર ભાગ લીધો

ભરૂચ શહેરની વી.સી.ટી. મહિલા આર્ટ્સ એન્ડ કોમર્સ કોલેજ ખાતે બહેનો માટે આંતર કોલેજ રસ્સા ખેંચ સ્પર્ધાનું આયોજન કરવામાં આવ્યું હતું. જેમાં મોટી સંખ્યામાં વિદ્યાર્થીનીઓએ ઉત્સાહભેર ભાગ લીધો હતો.

વીર નર્મદ દક્ષિણ ગુજરાત યુનિવર્સિટી-સુરત સંલગ્ન વલ્લી ચેરીટેબલ ટ્રસ્ટ સંચાલિત વી.સી.ટી. મહિલા આર્ટ્સ એન્ડ કોમર્સ કોલેજ-ભરૂચ ખાતે VNSGUની આંતર કોલેજ રસ્સાખેંચ સ્પર્ધાનું આયોજન કરવામાં આવ્યું હતું. જેમાં મુખ્ય અતિથિ તરીકે ભરૂચ જિલ્લાના રમત વિકાસ અધિકારી રાજનસિંહ ગોહિલ વિશેષ ઉપસ્થિત રહ્યા હતા.

કોલેજની વિદ્યાર્થીનીઓ દ્વારા પરેડ કરી મહેમાનોને ટુર્નામેન્ટના મેદાન સુધી લઈ જવામાં આવ્યા, જ્યાં રીબીન કટ કરી મુખ્ય અતિથિ દ્વારા ટુર્નામેન્ટનું ઉદ્ઘાટન કરવામાં આવ્યું હતું. કોલેજની પરંપરા મુજબ સ્પર્ધાની શરૂઆત કોલેજની વિદ્યાર્થીનીઓ દ્વારા તિલાવતે કુરાન અને પ્રાર્થના દ્વારા કરવામાં આવી હતી.

એક દિવસીય આંતર કોલેજ સ્પર્ધામાં VNSGU સંલગ્ન દક્ષિણ ગુજરાતની 17 કોલેજની ટીમોએ ઉત્સાહપૂર્વક ભાગ લીધો હતો. જેમાં દરેક ટીમે પ્રતિભા અને જોરદાર હુંકાર સાથે પોતાની ખેલદિલી દર્શાવી હતી.

આ સ્પર્ધામાં પ્રથમ ક્રમાંકે શાહ એન.એચ. કોમર્સ કોલેજ, વલસાડ તેમજ દ્વિતીય ક્રમે શ્રીમતી જે.પી.શ્રોફ આર્ટ્સ કોલેજ, વલસાડ વિજેતા ટીમો જાહેર થઇ હતી. આ પ્રસંગે વી.સી.ટી. કેમ્પસના સી.ઈ.ઓ. કાઝી નુસરતજહાં, વી.સી.ટી મહિલા આર્ટસ એન્ડ કોમર્સ કોલેજના ઇન્ચાર્જ આચાર્યા અનસુયા ચૌહાણ, ડો. કેતન નીઝામા, ડૉ. ગર્વિષ્ઠા નાયક, પ્રો. કશ્મીરાબેન તેમજ કોલેજના તમામ પ્રધ્યાપકો ઉપસ્થિત રહ્યા હતા.