ભરૂચ : ગરીબી રેખા નીચે જીવન ગુજારતા લોકોના ઘરોમાં ફરી જુનવાણી ચૂલો સળગ્યો, ગેસ સિલિન્ડરમાં ભાવ વધારો મુખ્ય કારણ..!

• સરકાર દ્વારા જરૂરિયાતમંદો માટે ઉજ્જવલા યોજનો અમલ

• દિન પ્રતિદિન વધતો જતો ગેસ સિલિન્ડરનો ભાવ વધારો

• ભાવ વધારાના કારણે ઉજ્જવલા યોજનાને જાણે ગ્રહણ લાગ્યું

• અનેક મહિલાઓ ચૂલા ઉપર રસોઈ બનાવવા મજબૂર બની

• ગેસના બોટલનો ભાવ ઘટાડવામાં આવે તેવી મહિલાઓની માંગ

 દેશમાં વધતાં જતાં ગેસ સિલિન્ડરના ભાવ વધારાના કારણે કેન્દ્ર સરકારની ઉજ્જવલા યોજનાને જાણે ગ્રહણ લાગ્યું હોય, તેમ ભરૂચમાં અનેક લાભર્થી મહિલાઓ પહેલાના જમાનાની જેમ ચૂલા ઉપર રસોઈ બનાવવા મજબૂર બની છે. 

દેશમાં ગરીબી રેખા નીચે જીવન ગુજારતી મહિલાઓને મફત ગેસ સિલિન્ડર આપવા માટે કેન્દ્ર સરકાર દ્વારા ઉજ્વલા યોજનાનો પ્રારંભ કરવામાં આવ્યો હતો. આ યોજનામાં લાભાર્થીને વર્ષમાં 15 ગેસ સિલિન્ડર આપવામાં આવે છે. વર્ષમાં 2 સિલિન્ડર નિઃશુલ્ક, જ્યારે 10 સિલિન્ડર પર સરકાર સબસીડી જમા કરાવે છે.

એક સિલિન્ડરના 810 રૂપિયામાંથી સરકાર 300 રૂપિયાની સબસીડી લાભાર્થીના ખાતામાં જમા કરે છે, જ્યારે 3 સિલિન્ડર રેગ્યુલર ભાવ પર લાભાર્થીને મળે છે. પરંતુ આ યોજનામાં એક ચોકાવનારી વિગત બહાર આવી છે. મોટાભાગના લાભાર્થી હોય, અને તે પૈસાના અભાવે રીફીલ ન કરાવી સિલિન્ડર અભરાઈ પર કે, સાઈડ પર મુકી દીધા છે.

દિન પ્રતિદિન ગેસ સિલિન્ડરના ભાવ વધારાના કારણે અને મજુરી કરી પેટિયું રડનાર લોકો ફરી ગેસ સિલિન્ડર છોડીને ચૂલો સળગાવવા મજબૂર બન્યા છે. 2 વર્ષ પહેલા વડાપ્રધાન નરેન્દ્ર મોદીએ દેશની 2 કરોડ મહિલાઓને ચૂલાથી મુક્ત કરાવવા ખાસ અભિયાનનો પ્રારંભ કર્યો હતો. કેન્દ્ર સરકાર દ્વારા ઉજ્વલા યોજના અમલમાં મુકવામાં આવી હતી.

જેનાથી ચૂલાના ધુમાડાથી આંસુ સારતી મહિલાઓના આંસુ લુછવાનો પ્રયત્ન કેન્દ્ર સરકાર દ્વારા કરવામાં આવ્યો હતો. પરંતુ આ યોજના સાર્થક ન થઈ હોવાના ચોંકાવનારા આંકડા સામે આવ્યા છે. ભરૂચ જિલ્લાની વાત કરીએ તો, ભરૂચ જિલ્લામાં 1,19,683 મહિલા લાભાર્થીઓને આ યોજનામાં આવરી લેવામાં આવી હતી. પરંતુ 60,662 મહિલાઓ જ આ યોજનાનો લાભ લઈ રહી છે, જ્યારે બાકીની 59,021 મહિલાઓ આ યોજનાથી વંચિત રહી છે.

આ બાબતે લાભાર્થી મહિલાઓએ જણાવ્યું હતું કે, અમારા પાસે ગેસ સિલિન્ડર ભરાવવા માટે પૈસા જ નથી. અમે મજૂરીયાત વર્ગ છીએ. કોઈ વખત મજૂરી ન મળે તો અમને ખાવાના પણ ફાફા હોય છે, ત્યાં સિલિન્ડરના ભરવાના 800 રૂપિયા અમારે ક્યાંથી કાઢવા. જેથી ફરી લાકડાનો ઉપયોગ કરી ચૂલો સળગાવી રોજ 2 ટાઈમ રસોઈ બનાવી પોતાનું જીવન જીવવા મહિલાઓ મજબૂર બની છે.

સરકારની ઉજ્જવલા યોજના આવકાર્ય છે. પરંતુ ગેસના બોટલનો 800થી 900 અને કોઈક વખત તો 1100 રૂપિયા સુધી ભાવ વધી જતો હોય છે. જેથી ગરીબ મહિલાઓ આ પૈસા ક્યાંથી લાવે તેવા કારણથી ફરી એક વખત પહેલાના જમાનાની જેમ ચૂલો સળગાવવા દૂર સુધી લાકડા વીણવા અને કાપવા જવા પડે છે, ત્યારે સરકારની ઉજ્જવલા યોજનાનો લાભ મળે તે માટે ગેસના બોટલનો ભાવ ઘટાડવામાં આવે તેવી મહિલાઓ દ્વારા માંગ કરવામાં આવી છે.