ભરૂચ શહેરના ચિંગસપુરા-ગોલવાડ વિસ્તારમાં ખુલ્લી ગટરમાં ખાબકતાં એક વ્યક્તિનું મોત નીપજ્યું હતું. બનાવના પગલે મૃતકના પરિવારજનો અને સ્થાનિકોમાં પાલિકા પ્રત્યે ભારે આક્રોશ જોવા મળ્યો છે.

મળતી માહિતી અનુસાર, ભરૂચ શહેરના મારુ ફળિયાના વાલ્મિકી વાસ વિસ્તારમાં રહેતા મનોજ સોલંકી નારાયણ હોસ્પિટલમાં હંગામી ધોરણે ફરજ બજાવતા હતા. જેઓ ગતરોજ સવારે રાબેતા મુજબ નોકરી પર ગયા હતા, અને રાત્રીના સમયે નોકરી પરથી છૂટીને પરત પોતાના ઘરે આવી રહ્યા હતા. આ દરમિયાન ભરૂચમાં ધોધમાર વરસાદ શરૂ થયો હતો. જેના કારણે શહેરના અનેક નીચાણવાળા વિસ્તારોમાં પાણી ભરાઈ જવાથી જળબંબાકાર જેવી સ્થિતિ સર્જાઇ હતી, ત્યારે ચિંગસપુરા-ગોલવાડ નજીક પાલિકાએ બનાવેલી તૂટી ગયેલી ખુલ્લી ગટરમાં ખાબકતાં મનોજ સોલંકી ઉંડી ગટરના વહેતા પાણીમાં તણાઈ ગયા હતા.

તો બીજી તરફ, મનોજ સોલંકીના ઘર પરિવારના સભ્યો આખી રાત મનોજ ઘરે આવશે તેવી આશમાં કાઢી હતી. જોકે, સવાર થઈ જતા પણ તે ઘરે નહીં આવતા પરિવારજનો શોધવા નીકળતા દાંડિયા બજાર વિસ્તારમાં તેઓનો મૃતદેહ પડ્યો હોવાની માહિતી મળતા જ તેઓ સ્થળ પર દોડી ગયા હતાં. આ ઘટનાની જાણ થતાં જ ભરૂચ શહેરના સામાજિક કાર્યકર ધર્મેશ સોલંકીએ તાત્કાલિક સ્થળ પર પહોંચી મૃતદેહને ઘરે લાવ્યા હતા. આ અંગે ધર્મેશ સોલંકી અને પરિવારજનોએ નગરપાલિકાના સત્તાધીશો સામે રોષ વ્યક્ત કરી ન્યાયની માગણી કરી હતી.

જોકે, હાલમાં તો આ ઘટનામાં ભરૂચ મામલતદાર સહિતનો કાફલો મૃતકના ઘરે પહોંચીને ઘટના અંગેની તપાસ શરૂ કરી છે. ઉલ્લેખનીય છે કે, આ બાબતે પાલિકાના ચીફ ઓફિસર હરેશ અગ્રવાલે જણાવ્યું હતું કે, હાલમાં જે ખુલ્લી ગટર છે તેને તાત્કાલિક બંધ કરવાની કામગીરી હાથ ધરવામાં આવશે, અને જે કોઈ વ્યક્તિની બેદરકારી સામે આવશે તેના વિરુદ્ધ પણ કાર્યવાહી કરવમાં આવશે.

આ સમગ્ર ઘટનામાં ભરૂચ નગરપાલિકાની કામગીરી પર પણ અનેક સવાલો ઉઠવા પામ્યા છે. પાલિકાના કોન્ટ્રાક્ટર દ્વારા બનાવવામાં આવેલી ગટરો તૂટી જતાં ખુલ્લી બની જતાં અહીથી પસાર થતાં લોકોને ભારે હાલાકીનો સામનો કરવો પડતો હોય છે, જ્યારે ખુલ્લી ગટરો તેમજ ઉભરાતી ગટરો સહિત મુખ્ય માર્ગો પર ગોઠણસમા વરસાદી પાણી ભરાઈ જવાના દ્રશ્યો પાલિકાની કરોડો રૂપિયાની પ્રી-મોન્સુન કામગીરીની પોલ ખોલતા હોય તેમ લાગી રહ્યું છે.