જૂનાગઢના મધુરમ બાયપાસ પર કાર બળીને ખાખ, ચાલકનો આબાદ બચાવ

જૂનાગઢના મધુરમ બાયપાસ પર મંગળવારે રાત્રે એક XUV કાર અચાનક આગની લપેટમાં આવી ગઈ હતી. કારચાલક ઈશાનભાઈ આહીર ઝાંઝરડા ચોકડી તરફ જઈ રહ્યા હતા ત્યારે મધુરમ બાયપાસથી થોડે દૂર પહોંચતાં જ કારની હેડલાઈટ્સ અચાનક બંધ થઈ ગઈ હતી. તે સાથે જ કારના બોનેટમાંથી ધુમાડો નીકળવા લાગ્યો હતો.

સદનસીબે, ઈશાનભાઈએ તરત જ કાર રોકીને બહાર નીકળી જવાનો નિર્ણય લીધો, જે તેમના માટે જીવનરક્ષક સાબિત થયો. કારમાંથી બહાર નીકળ્યા બાદ ગણતરીની મિનિટોમાં જ આગે વિકરાળ સ્વરૂપ ધારણ કરી લીધું અને આખી કાર આગની લપેટમાં આવી ગઈ.

ઘટનાની જાણ થતાં જ ફાયર બ્રિગેડની ટીમ તાત્કાલિક ઘટનાસ્થળે પહોંચી ગઈ હતી. ફાયર ફાઈટર્સે પાણીનો મારો ચલાવીને આગ પર કાબૂ મેળવ્યો હતો, પરંતુ ત્યાં સુધીમાં કાર સંપૂર્ણપણે બળીને ખાખ થઈ ગઈ હતી. આ ઘટનાને પગલે આસપાસના વિસ્તારમાંથી મોટી સંખ્યામાં લોકો ઘટનાસ્થળે એકત્રિત થઈ ગયા હતા. આ અકસ્માતમાં કોઈ જાનહાની થઈ ન હતી, જે એક મોટી રાહતની વાત છે.