દેવભૂમિ દ્વારકા : CNG પંપ પર નોઝલની અવ્યવસ્થાના કારણે રીક્ષા ચાલકો પરેશાન, વિશાળ રેલી યોજી તંત્રને પાઠવ્યું આવેદન...

• CNG પંપની અવ્યવસ્થાના કારણે રીક્ષા ચાલકો પરેશાન

• CNG રીક્ષા ચાલકોએ વિશાળ રેલી યોજી વિરોધ દર્શાવ્યો

• દ્વારકા હેલિપેડથી પ્રાંત કચેરી સુધી વિશાળ રેલી યોજાય

• દ્વારકા પ્રાંત કચેરીએ આવેદન પત્ર પાઠવી રજૂઆત કરી

• CNG પંપ પર અલગ નોઝલ મુકવામાં આવે તેવી માંગ

દેવભૂમિ દ્વારકા જીલ્લામાં CNG પંપની અવ્યવસ્થાના કારણે પરેશાન CNG રીક્ષા ચાલકોએ વિશાળ રેલી યોજી પ્રાંત કચેરીએ આવેદન પત્ર પાઠવી રજૂઆત કરી હતી.

દેવભૂમિ દ્વારકા જીલ્લાના દ્વારકા શહેરમાં અંદાજે 250થી વધુ CNG રીક્ષાઓ દોડે છે, જ્યારે નજીકનું CNG પંપ દ્વારકાથી 30 કિમિ દૂર કુરંગા ગામે આવેલ છે, ત્યાં દરરોજ રીક્ષા ચાલકો 60 કિલોમીટર અપ-ડાઉન કરીને રીક્ષામાં ગેસ ભરાવવા જાય છે, જ્યાં CNG પંપ સંચાલક દ્વારા અલગ નોઝલ રાખવાના બદલે રેગ્યુલર વાહનો સાથે રીક્ષા ચાલકોને પણ કલાકો સુધી લાંબી કતારમાં ઉભા રહેવા મજબૂર કરવામાં આવે છે.

ત્યારે રીક્ષા ચાલકો દ્વારા માંગ કરવામાં આવી છે કે, દરેક શહેરની જેમ દ્વારકામાં પણ CNG પંપ પર સ્થાનિક રીક્ષા ચાલકો માટે એક અલગ નોઝલ મુકવામાં આવે. જેથી રીક્ષા ચાલકોનો વધારે સમય બગડે નહીં અને ધંધા રોજગારી પર અસર પડે નહીં. હાલ CNG પંપ પર 2-3 કલાક લાઈનમાં રહેવાથી રીક્ષા ચાલકોનો આખો દિવસ બગડી જાય છે, અને ધંધો થઇ શકતો નથી. તેથી તમામ રીક્ષા ચાલકોએ દ્વારકા હેલિપેડ ખાતેથી પ્રાંત કચેરી સુધી પોતપોતાની રીક્ષાઓ લઇ વિશાળ રેલી યોજી હતી. આ સાથે જ પ્રાંત કચેરીએ આવેદન પત્ર આપી યોગ્ય વ્યવસ્થા કરી આપવા રજુઆત કરવામાં આવી હતી.