સાબરકાંઠા જીલ્લામાં ચોમાસાની સિઝનમાં હજુ પણ વરસાદ ન વરસતા ખેડૂતોની હાલત કફોડી બની છે, આમ તો ખેડૂતોએ વાવેતર શરુ કર્યુ છે. પરંતુ કેટલાક ખેડૂતો વરસાદની કાગડોળે રાહ જોઈ બેઠા છે.
સાબરકાંઠા જીલ્લામાં ચોમાસુ વાવેતરમાં મગફળી અને કપાસનું સૌથી વધુ વાવેતર કરવામાં આવે છે. ગત વર્ષે મગફળી અને કપાસના અધધ ભાવ મળ્યા હતા. જેને લઈને આ વખતે પણ ખેડૂતોએ મગફળી અને કપાસનું વધુ વાવેતર કરવાની તૈયારી કરી છે. પરંતુ ચાલુ વર્ષે સાબરકાંઠા જીલ્લામાં વરસાદ થોડો મોડો થયો છે. પહેલા એક કે, બે દિવસ વરસાદ આવ્યો, અને એ પણ સામાન્ય. જે વિસ્તારમાં પાણીની વ્યવસ્થા છે, ત્યાં ખેડૂતોએ કપાસ અને મગફળીનું વાવેતર કર્યું હતું. પરંતુ હાલ વરસાદ ન પડતા પાક પણ મુંજાવા લાગ્યો છે. ખાતર, દવા અને બીયારણ પણ તૈયાર છે. પરંતુ અહીના પંથકમાં વરસાદ નથી. જેથી ખેડૂત વરસાદની રાહ જોઈને બેઠો છે. તો સાથે જ ખેતરમાં જંગલી ભુંડ અને રોઝનો પણ ત્રાસ વધતા ખેડૂતો મુશ્કેલીમાં મુકાયા છે.