ખેડા : દૂધનું દૂધ અને પાણીનું પાણી કરવા રુદણ ગામે તબેલામાં અમૂલ ડેરીના દરોડા…

મહેમદાવાદના રૂદણ ગામે તબેલા પર અમૂલ દ્વારા તપાસ

માત્ર 20 પશુઓ રાખી હજારો લીટર દૂધ અમૂલમાં ભરાતું

ડુપ્લીકેટ દૂધ બનાવતા હોવાની મળી હતી બાતમી : અમૂલ

દૂધ ભરેલા ટેન્કરને સીલ મારી તપાસ અર્થે FSL મોકલાયું

ખેડા જિલ્લાના મહેમદાવાદ તાલુકાના રૂદણ ગામની સીમમાં આવેલા તબેલામાં દૂધનું દૂધ અને પાણીનું પાણી નક્કી કરવા અમૂલના કર્મચારીઓ દ્વારા આકસ્મિક તપાસ હાથ ધરવામાં આવી હતી. આ ઓચિંતી તપાસના કારણે પશુપાલકોમાં ભારે ફફડાટ ફેલાયો હતો. અમૂલે સ્થાનિક પોલીસને સાથે રાખી તબેલામાં તપાસ કરતાં દૂધનો જથ્થો મળી આવ્યો હતો. જેમાં ડુપ્લીકેટ દૂધ બનાવતા હોવાની બાતમીના આધારે અમૂલ દ્વારા સ્થળ તપાસ કરાય હતી. જેમાં અંદાજિત 1 હજાર લીટર જેટલું દૂધનું ટેન્કર મળી આવ્યું હતું.

આ દૂધના સેમ્પલો મેળવી લેબમાં પરીક્ષણ અર્થે મોકલી આપવામાં આવ્યા છે. અમૂલ ડેરીના કર્મચારી ડો. યોગેશ પટેલે જણાવ્યું હતું કે, અમને અરજી મળતાં સ્થળ તપાસ કરવામાં આવી છે. જોકે, કોઈ વાંધાજનક ચીજવસ્તુઓ મળી નથી. અમને અરજીમાં જાણવા મળ્યું હતું કે, આ જે તબેલાના માલિક છે, તેની પાસે 20 જેટલા પશુઓ છે, અને દૂધ વધુ માત્રામાં ટર્નઓવર થાય છે. જેથી તપાસ હાથ ધરી હતી, જ્યાં ખરેખર 20 જેટલા જ પશુઓ હતા. જોકે, તબેલાના માલિકે જણાવ્યું કે, આ દૂધ અમે જિલ્લા બહારથી અમારા અન્ય તબેલામાંથી લાવીએ છીએ. વધુમાં 20 પશુઓનું અંદાજીત 130 લીટરની આસપાસ દૂધ મળે, પરંતુ 1 હજાર લીટર શક્ય નથી. જોકે, હાલ 1 હજાર લીટર દૂધ ભરેલા ટેન્કરને સીલ મારી તપાસ અર્થે FSLમાં મોકલવામાં આવ્યું છે.