ગુજરાતના દરિયામાંથી રૂ. 600 કરોડની કિંમતના 86 કિલો ડ્રગ્સ સાથે 14 પાકિસ્તાનીઓ ઝડપાયા

ગુજરાતના દરિયામાંથી અવારનવાર નશીલા પદાર્થ ઝડપાતા હોય છે, ત્યારે વધુ એક વખત ડ્રગ્સનો જથ્થો ઝડપી લેવામાં સુરક્ષા એજન્સીઓને સફળતા મળી છે. અરબી સમુદ્ર માર્ગે નશીલા પદાર્થનો કાળો કારબોર કરનારા સુરક્ષા એજન્સીના સકંજામાં આવી જાય છે. ગુજરાતના દરિયામાંથી અત્યારસુધીમા કરોડો રૂપિયાનું ડ્રગ્સ ઝડપાયું છે.

કોસ્ટગાર્ડ, NCB અને ATSને મળેલા ઇનપુટના આધારે અરબી સમુદ્રમાંથી ડ્રગ્સનો 86 કિલો જથ્થો ઝડપાયો છે, જેની બજારકિંમત રૂ. 600 કરોડ હોવાનું જાણવા મળ્યું છે. ડ્રગ્સના જથ્થા સાથે 14 પાકિસ્તાની પણ ઝડપ્યા છે. પોરબંદર ઇન્ડિયન કોસ્ટ ગાર્ડે 28 એપ્રિલ 24ના રોજ દરિયામાં ગુપ્ત માહિતી આધારે એન્ટી-નાર્કોટિક્સ ઓપરેશન હાથ ધર્યું હતું, જેમાં પાકિસ્તાની બોટમાંથી 14 ક્રૂ સાથે રૂ. 600 કરોડની કિંમતનો અંદાજે 86 કિલો નાર્કોટિક્સ પકડવામાં આવ્યું હતું. આ ઓપરેશનમાં ભારતીય કોસ્ટ ગાર્ડ (ICG) એન્ટી ટેરરિઝમ સ્ક્વોડ (ATS) અને નાર્કોટિક્સ કંટ્રોલ બ્યૂરો (NCB)એ સહયોગ કર્યો હતો, જે સફળ ઓપરેશનમાં પરિણમ્યું હતું.