પંચમહાલ અને વડોદરાના અનેક ખેડૂતો પાસેથી ટ્રેક્ટર ભાડે લઈ છેતરપીંડી આચરનાર ડેસર તાલુકાના છાલીયેર ગામનો ઠગ પોલીસના સકંજામાં આવ્યો છે.
મળતી માહિતી અનુસાર, પંચમહાલ જિલ્લાના કાલોલ તાલુકાના મલાવ ગામના એક ટ્રેક્ટર માલિક સાથે વડોદરા જિલ્લાના ડેસર તાલુકાના છાલિયેર ગામના ભેજાબાજ ઈસમે ટ્રેક્ટર ભાડે રાખીને ટ્રેક્ટરનું ભાડું નહીં ચૂકવ્યું હતું. આ સાથે જ ટ્રેક્ટર પણ પરત નહીં આપી ટ્રેક્ટર માલિક સાથે છેતરપિંડી આચરી હતી. સમગ્ર મામલે ટ્રેક્ટર માલિકે કાલોલ પોલીસ મથક ખાતે ભેજાબાજ ઈસમ વિરુદ્ધ ફરિયાદ નોંધાવી હતી, ત્યારે ટ્રેક્ટર માલિકની ફરિયાદના આધારે પોલીસે તપાસ હાથ ધરી ભેજાબાજને ઝડપી પાડ્યો હતો. આ ભેજાબાજ ઈસમે 17 જેટલા ટ્રેક્ટર માલિકો સાથે છેતરપિંડી આચરી હોવાનો ભેદ ઉકેલાતા પોલીસે 17 ટ્રેક્ટરો પણ કબ્જે લીધા છે, ત્યારે હાલ તો, કાલોલ પોલીસે રૂ. 82 લાખના 17 ટ્રેક્ટર અને એક ઇકો કાર જપ્ત કરી આગળની તપાસ આરંભી છે.