પંચમહાલ: સામલી બેટીયા ગામ પાસેના જંગલ વિસ્તારમાં મળ્યો યુવકનો મૃતદેહ, હત્યાની આશંકા
ગોધરા તાલુકાના બેટીયા પાસે યુવકની હત્યા કરાયેલી હાલતમાં મૃતદેહ મળી આવ્યો છે.
ગોધરા તાલુકાના સામલી બેટીયા ગામ પાસેના જંગલ વિસ્તારમાંથી હત્યા કરાયેલ યુવકનો મૃતદેહ મળી આવતાં ખળભળાટ મચી ગયો છે. ગોધરા શહેરના ઝાકીરહુસેન સ્કૂલની સામે, હયાતની વાડી વિસ્તારના રહેવાસી મોહંમદ હનીફ દસ્તગીર બદામ નામના યુવકની હત્યા કરેલી હાલતમાં મૃતદેહ મળી આવ્યો છે. મૃતકના શરીરના ભાગે તિક્ષ્ણ હથિયારના ઘા મળી આવ્યા છે. આ યુવક ગુમ થયો હતો. મોડી રાત્રી સુધી પરત ન આવતા આ યુવક ગુમ થયો હોવાને લઈને તેની શોધખોળ આદરી હતી અને તેની ભાળ મેળવવા માટે પરીવાર જનોએ આજુબાજુ તેમજ તેના મિત્રો અને સોશિયલ મીડિયાની પણ મદદ લીધી હતી. પરંતુ તેની ક્યાંય ભાળ ન મળતા પરિજનોએ ગોધરા બી ડીવીઝન પોલીસ સ્ટેશનમાં આ અંગે અરજી પણ આપવામાં આવેલ હતી. આ અરજીને આધારે તપાસ કરતા યુવકની મોટર સાયકલ દરૂનીયા રોડ ઉપરથી બિનવારસી હાલતમાં મળી આવતા કબ્જે લઈને ગોધરા બી ડીવીઝન પોલીસ મથકમાં લઈ જવામાં આવી હતી અને આગળ વધુ તપાસમાં પોલીસને બેટીયા ગામના જંગલ વિસ્તારમાંથી એક યુવકનો મૃતદેહ મળી આવ્યો હતો. આ ઘટનાને પગલે જિલ્લા પોલીસ અધિક્ષક ડો. લીના પાટીલ અને નાયબ પોલીસ અધિક્ષક સી.સી. ખટાના સહિત પોલીસ ટીમ ઘટના સ્થળે પહોંચી વધુ તપાસ હાથ ધરી છે. જોકે, આ યુવકની હત્યા કોણે કરી અને કેમ કરી તે કારણ હજુ પણ અકબંધ છે.
