રૂવાડા ઉભા કરી દેતો વિડિયો..! : વડોદરામાં ગાયો વૃદ્ધાને પિંખતી રહી, પગ ભાંગી જતાં વૃદ્ધાનું મોત...
માણેજા વિસ્તારમાં વૃદ્ધા પર રખડતાં ઢોરનો હુમલો
ગાયોએ ખૂંદતા વૃદ્ધાના પગના લોચે-લોચા નીકળ્યા
તરફડ્યા મારતા વૃદ્ધાનું ઘટના સ્થળે મોત નીપજ્યું
વડોદરામાં રખડતા ઢોરની સમસ્યા એટલી વકરી રહી છે કે, હવે દિન પ્રતિદિન સામાન્ય બની ગઇ છે. તંત્ર દ્વારા કાર્યવાહી કરવામાં આવે તો પશુપાલકો હુમલો કરવા સાથે પશુઓને મુક્ત કરાવી જાય છે. આ બધામાં નિર્દોષ પ્રજાને ભોગ બનવાનો વારો આવે છે, ત્યારે વડોદરા શહેરના માણેજા વિસ્તારની પંચરત્ન સોસાયટીમાં રહેતા 60 વર્ષીય વૃદ્ધા ગંગાબેન પરમાર પોતાનું કામકાજ કરીને પરત ફરી રહ્યા હતા, ત્યારે ગાયે એવા અડફેટે લીધા કે, વૃદ્ધ મહિલાનું ત્યાં જ પ્રાણ પંખીડું ઉડી ગયુ. તંત્રની બેદરકારીના કારણે આખરે મહિલાને જીવ ગુમાવવાનો વારો આવ્યો હતો. સમગ્ર મામલે ઘટના સ્થળે સ્થાનિકોના ટોળા ઉમટી પડ્યા હતા.
રૂવાડા ઉભા કરી દેતો વિડિયો..! : વડોદરામાં ગાયો વૃદ્ધાને પિંખતી રહી, પગ ભાંગી જતાં વૃદ્ધાનું મોત...બનાવની જાણ થતા જ પોલીસ પણ પહોંચી હતી. સ્થાનિકોએ અહીંના પશુપાલકો પર આકરા આક્ષેપ કરતાં જણાવ્યુ હતું કે, અહીં ગાયોનો ત્રાસ ઘણા સમયથી છે. મોડી રાત્રે આવીએ, ત્યારે પણ ગાયો રખડતી હોય છે. આ પહેલા પણ એક વ્યક્તિ પર ગાયે હુમલો કર્યો હતો. એટલું જ નહીં, બાળકોને લઇને રસ્તા પરથી પસાર થઇએ, ત્યારે રખડતી ગાયો જોઈ ખૂબ ડર લાગે છે. ઉપરાંત મૃતક વૃદ્ધાના દીકરાએ જણાવ્યુ હતું કે, આજે મારી માતાને ખોવાનો વારો આવ્યો છે, મને ન્યાય જોઇએ. અહીં પશુપાલકો સામે બેઠા હોય છે, તો પણ તેમની ગાયોને લઇ જતા નથી. અત્રે ઉલ્લેખનીય છે કે, આ ઘટનાનો વિડીયો સામે આવ્યો છે. જે જોઇને રૂવાડા ઉભા થઇ જશે. જોકે, આ ઘટના બાદ પાલિકા તંત્ર જાગ્યું હતું, જ્યાં ઢોર ડબ્બા લઇને ઢોર પકડવાની કામગીરી તેજ કરવામાં આવી હતી.
