વક્ફ સંપત્તિ રજિસ્ટ્રેશનને 3 મહિનાની રાહત, ટ્રિબ્યુનલ તરફ જવાની સલાહ

વક્ફ સંપત્તિઓને ‘ઉમ્મીદ’ પોર્ટલ પર રજિસ્ટર કરાવવા માટે નક્કી કરાયેલ છ મહિનાનો ગાળો 5 ડિસેમ્બરથી પૂર્ણ થઈ રહ્યો છે, પરંતુ દેશભરમાં લાખો સંપત્તિઓ હજુ નોંધણીથી બહાર છે.

આ પરિસ્થિતિને ધ્યાનમાં રાખીને કેન્દ્ર સરકારે લોકોને તાત્કાલિક મદદરૂપ થવા માટે ત્રણ મહિનાનો વધારાનો ગ્રેસ પિરિયડ આપવાનો નિર્ણય કર્યો છે. આ અવધિ દરમિયાન કોઈ દંડ, પેનલ્ટી અથવા કડક કાર્યવાહી નહીં કરવામાં આવે, જેથી વિલંબિત દસ્તાવેજો અથવા તકનીકી મુશ્કેલીઓનો સામનો કરનાર લોકોને નોંધણી પૂર્ણ કરવાની તક મળી રહે.

અલ્પસંખ્યક મામલાના મંત્રી કિરેન રિજિજૂએ જણાવ્યું કે દેશભરમાં અત્યાર સુધી 1.51 લાખથી વધુ સંપત્તિઓનું સફળતાપૂર્વક રજિસ્ટ્રેશન થઈ ગયું છે. કર્ણાટક, પંજાબ અને જમ્મુ-કાશ્મીરે સારા પરિણામો દર્શાવ્યા છે, જ્યારે કેટલાક મોટા રાજ્યોમાં પ્રક્રિયા ધીમી રહી છે. અનેક વિસ્તારોમાંથી ‘ઉમ્મીદ’ પોર્ટલ ધીમું હોવાની ફરિયાદો મળી હતી, તેમજ ઘણા લોકો પાસે જરૂરી દસ્તાવેજો પૂરા ન હોવાથી તેઓ સમયસર રજિસ્ટ્રેશન કરી શક્યા નહોતા. સરકારનું કહેવું છે કે કોઈપણ વ્યક્તિને કોઈ અડચણ વિના પોતાની સંપત્તિ નોંધાવી શકે, તે માટે આ વધારાનો સમયગાળો મદદરૂપ બનશે.

રિજિજૂએ સ્પષ્ટ કર્યું કે સુપ્રીમ કોર્ટે છ મહિનાની સમયમર્યાદા નક્કી કરી હોવાથી કેન્દ્ર સરકાર તેને સીધી રીતે વધારી શકતી નથી. જોકે વક્ફ ટ્રિબ્યુનલ પાસે અધિકાર છે કે તે પરિસ્થિતિને ધ્યાનમાં રાખીને વધારાની મુદત આપી શકે. જે લોકોને હજુ વહીવટી અથવા દસ્તાવેજી કારણોસર મુશ્કેલી થઈ રહી હોય તેવા લોકોને તેમણે ટ્રિબ્યુનલમાં અરજી કરવાની સલાહ આપી.

કેન્દ્ર સરકારે રાજ્યોને પણ જવાબદાર ઠેરવ્યા છે કે જાગૃતિ ફેલાવવામાં અને પ્રક્રિયાને સુગમ બનાવવામાં તેમણે પૂરતી ગંભીરતા દેખાડી નથી. રિજિજૂએ તમામ રાજ્ય સરકારોને અપીલ કરી કે આગામી સમયમાં આ પ્રકારની મુશ્કેલીઓ ન સર્જાય તે માટે યોગ્ય આયોજન કરે, જેથી વક્ફ સંપત્તિઓના રજિસ્ટ્રેશનમાં પારદર્શિતા અને સરળતા સુનિશ્ચિત થાય.