અયોધ્યાના રામ મંદિર પરિસરમાં 30 કરોડની ભવ્ય સુવર્ણ પ્રતિમા સ્થાપિત થશે

અયોધ્યાના રામલલા મંદિર પરિસરમાં ટૂંક સમયમાં એક ભવ્ય અને અત્યંત કિંમતી સુવર્ણ પ્રતિમા બિરાજમાન થવા જઈ રહી છે.

કર્ણાટકના એક ગુપ્ત દાતા દ્વારા અર્પણ કરાયેલી આ વિશેષ પ્રતિમા મંગળવારે સાંજે અયોધ્યા પહોંચી ગઈ હતી. સોનાથી બનેલી આ મૂર્તિ પર હીરા, માણેક, પન્ના અને નીલમ જેવા કિંમતી રત્નો જડવામાં આવ્યા છે, જેના કારણે તેની અંદાજિત કિંમત રૂ. 30 કરોડ જેટલી આંકવામાં આવી રહી છે. આ પ્રતિમા રામ મંદિરની આધ્યાત્મિક અને સાંસ્કૃતિક ભવ્યતામાં વધુ એક મહત્ત્વપૂર્ણ આયામ ઉમેરશે એવું માનવામાં આવી રહ્યું છે.

દક્ષિણ ભારતીય શૈલીમાં તૈયાર કરાયેલી આ સુવર્ણ પ્રતિમા આશરે 10 ફૂટ ઊંચી અને 8 ફૂટ પહોળી છે. શ્રી રામ જન્મભૂમિ તીર્થ ક્ષેત્ર ટ્રસ્ટના સભ્ય ડૉ. અનિલ મિશ્રાએ માહિતી આપતા જણાવ્યું હતું કે, દાતાએ પોતાની ઓળખ સંપૂર્ણ રીતે ગુપ્ત રાખવાની વિનંતી કરી છે. હાલ આ પ્રતિમાની વિવિધ સ્તરે તકનીકી અને ધાર્મિક તપાસ કરવામાં આવી રહી છે. પ્રતિમાનું કુલ વજન અંદાજે 500 કિલોગ્રામ હોવાનું પણ તેમણે જણાવ્યું. પ્રતિમામાં ઉપયોગમાં લેવાયેલા સોનું, હીરા અને અન્ય રત્નોની માત્રા અને શુદ્ધતા અંગે નિષ્ણાતો દ્વારા વિશેષ તપાસ ચાલી રહી છે.

આ ભવ્ય પ્રતિમાના નિર્માણમાં તમિલનાડુના તાંજોર વિસ્તારના કુશળ અને અનુભવી શિલ્પકારોએ મહત્વની ભૂમિકા ભજવી છે. પરંપરાગત દક્ષિણ ભારતીય કળા અને આધુનિક સૌંદર્યશાસ્ત્રનું સંયોજન આ મૂર્તિમાં સ્પષ્ટ રીતે જોવા મળે છે. ટ્રસ્ટના સૂત્રોના જણાવ્યા મુજબ, પ્રતિમાનું સ્થાપન ધાર્મિક વિધિ અને શાસ્ત્રીય નિયમો અનુસાર કરવામાં આવશે, જેથી મંદિરની પવિત્રતા અને પરંપરા જળવાઈ રહે.

ઉલ્લેખનીય છે કે રામલલાની પ્રાણ પ્રતિષ્ઠાના બે વર્ષ પૂર્ણ થવાના અવસરે 29 ડિસેમ્બર 2025થી 2 જાન્યુઆરી 2026 દરમિયાન અયોધ્યામાં ‘પ્રતિષ્ઠા દ્વાદશી’ની ભવ્ય ઉજવણી યોજાશે. આ પાંચ દિવસીય મહોત્સવ દરમિયાન રામ મંદિરના ગર્ભગૃહમાં અભિષેક, શૃંગાર, ભોગ અર્પણ અને પ્રાગટ્ય આરતી સહિત અનેક ધાર્મિક તથા સાંસ્કૃતિક કાર્યક્રમોનું આયોજન કરવામાં આવશે. આ અવસરે સુવર્ણ પ્રતિમાની હાજરીથી ઉજવણીને વિશેષ મહત્ત્વ અને ભવ્યતા મળશે એવી શ્રદ્ધાળુઓમાં ભાવના વ્યક્ત કરવામાં આવી રહી છે.