પશ્ચિમ બંગાળથી બાંગ્લાદેશ સુધી 5.6–5.7 તીવ્રતાના જોરદાર ભૂકંપથી લોકોમાં ફફડાટ

શુક્રવારે વહેલી સવારે આવેલા જોરદાર ભૂકંપે પશ્ચિમ બંગાળથી લઈ બાંગ્લાદેશ સુધીના વિસ્તારોને હચમચાવી દીધા હતા

કોલકાતા સહિત ત્રિપુરા અને બાંગ્લાદેશની રાજધાની ઢાકામાં પણ સ્પષ્ટ આંચકા અનુભવાતા લોકો ગભરાટમાં ઘરો અને ઈમારતોમાંથી દોડી બહાર આવી ગયા હતા. ભારતીય સિસ્મોલોજીકલ ડેટા મુજબ પશ્ચિમ બંગાળમાં તીવ્રતા લગભગ 5.6 નોંધાઈ હતી, જ્યારે જર્મન રિસર્ચ સેન્ટર ફોર જિયોસાયન્સ (GFZ) અનુસાર ભારત–બાંગ્લાદેશ વિસ્તારમાં ભૂકંપની તીવ્રતા 5.7 હતી. આ તીવ્રતા ‘મધ્યમથી ગંભીર’ શ્રેણીમાં ગણાય છે અને ખાસ કરીને ઘનવસતિવાળા વિસ્તારો માટે જોખમી હોય છે.

GFZએ જણાવ્યું કે આ ભૂકંપનું કેન્દ્ર જમીનથી લગભગ 10 કિ.મી. ઊંડાઈએ હતું, એટલે કે તેનું એપીસેન્ટર તુલનાત્મક રીતે ઊથલ હોવાથી આંચકા વધુ પ્રબળ અનુભવાયા હતા. ખાસ નોંધનીય વાત એ છે કે એ જ સવારે પાકિસ્તાનમાં પણ 5.7 તીવ્રતાનો ભૂકંપ આવ્યો હતો, જેના આંચકા અફઘાનિસ્તાન સુધી અનુભવાયા હતા. થોડા જ કલાકોમાં દક્ષિણ એશિયાના વિશાળ વિસ્તારમાં બે મોટા ભૂકંપના આંચકા નોંધાતા લોકોમાં વધેલો ભય અને ગભરાટ સ્વાભાવિક બન્યો છે.

હાલ સુધી કોઈ મોટી જાનહાનિ અથવા નુકસાનની સત્તાવાર માહિતી સામે આવી નથી, પરંતુ કોલકાતા, સિલિગુરી, આગર્તલા અને ઢાકા જેવા શહેરોમાં સતત ટ્રેમર્સ અનુભવાતા સ્થાનિક પ્રશાસને ચેતવણી અને સાવચેતીના ઉપાયો જાહેર કર્યા છે. એનડીઆરએફ ટીમો પણ સજ્જ રહેવા તૈનાત કરવામાં આવી છે જેથી કોઈ અનિચ્છનીય પરિસ્થિતિ ઉપજે તો તરત મદદ મળી શકે.