દિલ્હીની શાળાઓમાં શુદ્ધ હવા માટે 10 હજાર વર્ગખંડોમાં એર પ્યુરિફાયર લાગશે

વિદ્યાર્થીઓને પ્રદૂષણથી બચાવીને ચોખ્ખી અને સ્વચ્છ હવામાં અભ્યાસ કરવાની તક મળે તે માટે દિલ્હી સરકાર દ્વારા મહત્વનો નિર્ણય લેવામાં આવ્યો છે.

દિલ્હી શિક્ષણ પ્રધાન આશિષ સૂદે શનિવારે પત્રકાર પરિષદમાં જાહેરાત કરી હતી કે પ્રથમ તબક્કામાં રાજધાનીની શાળાઓના 10,000 વર્ગખંડોમાં એર પ્યુરિફાયર લગાવવામાં આવશે. તેમણે જણાવ્યું કે સરકાર પ્રદૂષણ જેવી ગંભીર સમસ્યાનો તાત્કાલિક ઉપાયોથી નહીં પરંતુ લાંબા ગાળાના વહીવટી અને નીતિગત પગલાંઓ દ્વારા ઉકેલ લાવવા માટે કટિબદ્ધ છે.

સૂદે આ મુદ્દે અગાઉની આમ આદમી પાર્ટીની સરકાર પર આકરા શબ્દોમાં પ્રહાર કરતા કહ્યું હતું કે તેમની સરકાર માત્ર દેખાવડી ઝુંબેશો કે ગાડી ઓન-ગાડી ઓફ જેવા અભિયાનોમાં માનતી નથી, પરંતુ જમીન પર અસરકારક અને ટકાઉ ઉકેલ અમલમાં મૂકે છે. તેમણે ભારપૂર્વક કહ્યું કે સરકારનું મુખ્ય લક્ષ્ય એ છે કે દિલ્હીના બાળકો સ્માર્ટ રીતે ભણે, સ્વસ્થ રહે અને પ્રદૂષણમુક્ત વાતાવરણમાં શ્વાસ લઈ શકે.

શિક્ષણ પ્રધાને વધુમાં જણાવ્યું હતું કે સત્તાવાર આંકડાઓ અનુસાર દિલ્હીમાં કુલ 1047 સરકારી અને સરકારી ગ્રાન્ટ પ્રાપ્ત શાળાઓ છે, જેમાં અંદાજે 38,000 વર્ગખંડો કાર્યરત છે. સરકારની યોજના મુજબ આ તમામ વર્ગખંડોમાં તબક્કાવાર રીતે એર પ્યુરિફાયર સ્થાપિત કરવામાં આવશે, જેથી વિદ્યાર્થીઓને અભ્યાસ દરમિયાન પ્રદૂષિત હવામાં શ્વાસ લેવાની મજબૂરી ન રહે.

પ્રથમ તબક્કામાં પસંદ કરાયેલા 10,000 વર્ગખંડોમાં કામ શરૂ કરવામાં આવશે અને ત્યારબાદ ધીમે ધીમે સમગ્ર શાળા વ્યવસ્થાને આ સુવિધાથી સજ્જ કરવામાં આવશે. સરકારનું માનવું છે કે બાળકોના આરોગ્ય પર પ્રદૂષણની લાંબા ગાળાની અસરને રોકવા માટે આ પ્રકારના પગલાં અત્યંત જરૂરી છે અને તે ભવિષ્યમાં આરોગ્ય ખર્ચમાં પણ ઘટાડો લાવશે.

બીજી તરફ, દિલ્હીમાં હવાઈ પ્રદૂષણને કાબૂમાં લેવા માટે વાહનો સામે પણ કડક પગલાં લેવામાં આવી રહ્યા છે. આજે પીયુસી (પોલ્યુશન અન્ડર કંટ્રોલ) સર્ટિફિકેટ વગરના વાહનોને ઇંધણ ન આપવાનો નિર્ણય અમલમાં મૂકાયો હતો. અમલના પ્રથમ જ દિવસે પીયુસી વગરના 2800 વાહનોને પેટ્રોલ અને ડીઝલ આપવામાં આવ્યું નહોતું, જેના કારણે વાહનચાલકોમાં પણ જાગૃતિ ફેલાઈ છે.

આ નિર્ણયને અસરકારક બનાવવા માટે ત્રણ ખાસ એન્ફોર્સમેન્ટ ટીમો તૈનાત કરવામાં આવી હતી, જેમણે પેટ્રોલ પંપો પર દેખરેખ રાખી હતી. પ્રથમ દિવસે જ પીયુસી વગરના વાહનો સામે કુલ 3746 ચલણ જારી કરવામાં આવ્યા હતા. સરકારનું કહેવું છે કે આવા કડક પગલાંઓ દ્વારા વાહનોથી ફેલાતું પ્રદૂષણ ઘટાડવામાં મદદ મળશે અને શાળાઓમાં એર પ્યુરિફાયર જેવી વ્યવસ્થાઓ સાથે મળીને દિલ્હીની હવાની ગુણવત્તા સુધારવામાં મહત્વપૂર્ણ ભૂમિકા ભજવશે.