મહાદેવ સટ્ટાબાજી એપ કેસમાં ફરી એકવખત ઈડીની મોટી કાર્યવાહી, રૂ. 388 કરોડની વધારાની સંપત્તિ જપ્ત

મહાદેવ સટ્ટાબાજી એપ કેસમાં ફરી એકવખત ઈડી દ્વારા મોટી કાર્યવાહી કરવામાં આવી છે. ઈડીની રાયપુર પ્રાદેશિક કચેરીએ પ્રિવેન્શન ઓફ મની લોન્ડરિંગ એક્ટ (PMLA) હેઠળ કામચલાઉ એટેચમેન્ટ ઓર્ડર જાહેર કરતી વખતે મહાદેવ બેટિંગ એપ કેસમાં રૂ. 387.99 કરોડની વધારાની સંપત્તિ જપ્ત કરી છે. જેમાં જંગમ અને સ્થાવર મિલકતોનો સમાવેશ થાય છે, જેમાં મોરેશિયસ સ્થિત કંપની ટેનો ઇન્વેસ્ટમેન્ટ ઓપોર્ચ્યુનિટીઝ ફંડ દ્વારા વિદેશી પોર્ટફોલિયો રોકાણ અને સીધા વિદેશી રોકાણ (FDI) દ્વારા હરિ શંકર ટિબ્રેવાલ સાથે જોડાયેલા રોકાણોનો સમાવેશ થાય છે.

આ સંપત્તિઓમાં છત્તીસગઢ, મુંબઈ અને મધ્યપ્રદેશમાં આવેલી સ્થાવર મિલકતોનો પણ સમાવેશ થાય છે, જે મહાદેવ ઓનલાઈન બુક બેટિંગ એપના પ્રમોટર્સ, પેનલ ઓપરેટરો અને તેમના સહયોગીઓના નામે મળી આવી છે. મહાદેવ ઓનલાઈન બુક એ એક ગેરકાયદેસર સટ્ટાબાજીનું પ્લેટફોર્મ છે જે નવા યુઝર્સને સાઈન અપ કરવા, યુઝર આઈડી બનાવવા અને નકલી બેંક ખાતાઓ દ્વારા ભંડોળને બહાર કાઢવામાં વ્યસ્ત છે.