આસામ સરકારની કેબિનેટે રાજ્ય સરકારના કર્મચારીઓને આપી મોટી ભેટ

આસામ સરકારની કેબિનેટે રવિવારે રાજ્ય સરકારના કર્મચારીઓને મોટી ભેટ આપી છે. કેબિનેટે રાજ્ય સરકારના કર્મચારીઓના મોંઘવારી ભથ્થા (DA)માં 3 ટકાના વધારાને મંજૂરી આપી છે. મુખ્યમંત્રી હિમંત બિસ્વા સરમાએ આ માહિતી આપી. આ માહિતી આપતાં તેમણે કહ્યું કે રાજ્ય સરકારના કર્મચારીઓના ડીએમાં આ વધારો આ વર્ષના જુલાઈથી અમલી ગણવામાં આવશે. દિવાળી પહેલા રાજ્યના કર્મચારીઓને આસામ સરકારે મોટી ભેટ આપી છે.       

આ સાથે કેબિનેટની બેઠકની અધ્યક્ષતા કર્યા પછી પત્રકારો સાથે વાત કરતી વખતે મુખ્યમંત્રી હિમંત બિસ્વા સરમાએ તેના વિશે વિગતવાર માહિતી આપી. "આ સાથે, રાજ્ય સરકારના કર્મચારીઓનું કુલ DA 53 ટકા થશે, જે કેન્દ્ર સરકારના કર્મચારીઓની બરાબર છે" તેમણે કહ્યું કે વધેલો DA જુલાઇથી પાછલી અસરથી ચૂકવવાપાત્ર થશે. આ સિવાય બાકીની રકમ આવતા વર્ષે જાન્યુઆરીથી એપ્રિલ સુધીના માસિક પગાર સાથે ચાર સમાન હપ્તામાં ચૂકવવામાં આવશે.

મુખ્યમંત્રી હિમંત બિસ્વા સરમાએ વધુમાં કહ્યું કે કર્મચારીઓને ડિસેમ્બરથી સુધારેલા ડીએ સાથે પગાર મળશે. આ ઉપરાંત આસામ સરકારની કેબિનેટે પણ આસામ ટી ગાર્ડન પ્રોવિડન્ટ ફંડ સ્કીમમાં જૂની જોગવાઈને નાબૂદ કરવાનો નિર્ણય લીધો છે. અગાઉ 15,000 રૂપિયાથી વધુ માસિક વેતન ધરાવતા ચાના બગીચાના કામદારો વર્કર્સ પ્રોવિડન્ટ ફંડ (PF)નો લાભ મેળવી શકતા ન હતા.  મુખ્યમંત્રી હિમંત બિસ્વા સરમાએ જણાવ્યું હતું કે, "કાર્યકરોનો પગાર હવે વધી રહ્યો છે, અમે નથી ઈચ્છતા કે કોઈ પણ વ્યક્તિ PF લાભોથી વંચિત રહે, તેથી 15,000 રૂપિયાની માસિક આવકની મર્યાદા દૂર કરવાનો નિર્ણય લેવામાં આવ્યો છે."