મુંબઈ ભાંડુપમાં બેસ્ટ બસ બેકાબૂ, સ્ટેશન નજીક ચારનાં મોત અને નવ ઇજાગ્રસ્ત

સોમવારે રાત્રે મુંબઈના ભાંડુપ રેલ્વે સ્ટેશન નજીક એક ભયાનક માર્ગ અકસ્માત સર્જાતા સમગ્ર વિસ્તારમાં અફરાતફરી મચી ગઈ હતી.

ભાંડુપ પશ્ચિમના સ્ટેશન રોડ પર એક બેસ્ટ બસ અચાનક બેકાબૂ થઈ પલટી મારી જતાં સ્ટેશન પાસે બસની રાહ જોઈને ઊભેલા મુસાફરોને અડફેટે લીધી હતી. આ દુર્ઘટનામાં ચાર લોકોના ઘટનાસ્થળે જ કમકમાટીભર્યા મોત થયા હોવાની પુષ્ટિ કરવામાં આવી છે, જ્યારે નવ લોકો ગંભીર રીતે ઈજાગ્રસ્ત થયા છે. અકસ્માત બાદ ઘટનાસ્થળે ચીસાચીસ અને ગભરાટનું માહોલ સર્જાયો હતો.

પ્રાથમિક માહિતી અનુસાર, આ ઘટના 29 ડિસેમ્બરના રોજ રાત્રે આશરે 10:05 વાગ્યે બની હતી. બેસ્ટ બસ રિવર્સ લઈ રહી હતી તે દરમિયાન અચાનક ડ્રાઈવરે સ્ટેરિંગ પરથી કાબૂ ગુમાવ્યો હતો. બસ પાછળની તરફ જોરથી ખસી જતા સીધી જ બસની રાહ જોઈ રહેલા મુસાફરો પર ચડી ગઈ હતી. અકસ્માત એટલો ભયાનક હતો કે કેટલાક મુસાફરોને બસના નીચે દબાઈ જવા જેવી સ્થિતિ સર્જાઈ હતી, જેના કારણે જાનહાનિનો આંકડો વધ્યો હોવાનું માનવામાં આવી રહ્યું છે.

ઘટનાની જાણ થતાં જ પોલીસ, ફાયર બ્રિગેડ અને એમ્બ્યુલન્સની ટીમો તાત્કાલિક ઘટનાસ્થળે પહોંચી ગઈ હતી. બચાવ કામગીરી દરમિયાન ઈજાગ્રસ્તોને બહાર કાઢીને નજીકની સરકારી અને ખાનગી હોસ્પિટલોમાં સારવાર માટે ખસેડવામાં આવ્યા હતા. ઘટનાસ્થળે મોટી સંખ્યામાં લોકો ભેગા થઈ જતા સ્થિતિ વધુ તણાવપૂર્ણ બની હતી, જેને ધ્યાનમાં રાખીને પોલીસે ભીડ નિયંત્રિત કરી હતી. અકસ્માત બાદ બસના ડ્રાઈવરને પોલીસ દ્વારા ધરપકડ કરવામાં આવી છે.

હાલ પોલીસ દ્વારા અકસ્માતના ચોક્કસ કારણોની તપાસ શરૂ કરવામાં આવી છે. બસમાં કોઈ તકનીકી ખામી હતી કે ડ્રાઈવરની બેદરકારીના કારણે આ દુર્ઘટના બની, તે અંગે તપાસ ચાલી રહી છે. આ ઘટનાએ મુંબઈ જેવા વ્યસ્ત શહેરોમાં જાહેર પરિવહન વ્યવસ્થાની સલામતી અને બસ સંચાલનમાં વધુ કડક નિયમોની જરૂરિયાત પર ફરી એકવાર ગંભીર પ્રશ્નો ઊભા કર્યા છે.