ભાજપના IT સેલના વડા અમિત માલવીયા પર યૌન ઉત્પીડનનો આરોપ

કોંગ્રેસ નેતા સુપ્રિયા શ્રીનેતે 10 જૂનના રોજ એક પ્રેસ કોન્ફરન્સ યોજી હતી. સુપ્રિયાએ કહ્યું કે, આરએસએસના સભ્ય શાંતનુ સિન્હા નામના વ્યક્તિએ અમિત પર મહિલાઓનું યૌન ઉત્પીડન કરવાનો આરોપ લગાવ્યો છે. શાંતનુના કહેવા પ્રમાણે, અમિત મહિલાઓને 5 સ્ટાર હોટલમાં લઈ જાય છે અને તેમનું શોષણ કરે છે.એટલું જ નહીં, અમિતે બંગાળમાં બીજેપી ઓફિસમાં મહિલાઓનું યૌન શોષણ પણ કર્યું હતું. શાંતનુ બંગાળમાં ભાજપના અધિકારી રાહુલ સિન્હાના સંબંધી છે.

સુપ્રિયાએ આગળ કહ્યું હતું કે, અમે ભાજપ પાસેથી બંગાળમાં મહિલાઓ માટે ન્યાય માંગીએ છીએ. હાથરસ હોય, લખીમપુર હોય, આપણા સૌથી પ્રતિષ્ઠિત એથ્લેટ હોય કે બિલ્કીસ બાનો, વડાપ્રધાને ગુનેગારોને સતત રાજકીય રક્ષણ આપ્યું છે.

હવે સમય આવી ગયો છે કે તમે મહિલાઓ સાથે ઉભા રહો. તમે ભારતની દીકરીઓની સાથે ઊભા છો અને જ્યાં સુધી તમે તેમની દુર્દશાનો જવાબ નહીં આપો ત્યાં સુધી તમને સત્તામાં રહેવાનો કોઈ અધિકાર નથી.

આ પછી અમિત માલવિયાએ શાંતનુ સિન્હાને 10 કરોડ રૂપિયાની માનહાનિની ​​નોટિસ મોકલી છે. માલવિયાએ શાંતનુને બિનશરતી માફી માંગવા અને સોશિયલ મીડિયા પર તેમના વિશે લખેલી પોસ્ટ્સ દૂર કરવા પણ કહ્યું છે.