છત્તીસગઢ બંધ વચ્ચે રાયપુરમાં ક્રિસમસ ઉજવણીમાં ભંગ, મોલમાં તોડફોડ

રાયપુરમાં બંધ દરમિયાન સ્થિતિ ત્યારે તંગ બની જ્યારે પ્રદર્શનકારીઓ રાયપુરના પ્રખ્યાત મેગ્નેટો મોલમાં ઘૂસી ગયા હતા. 

છત્તીસગઢના કાંકેર જિલ્લામાં થયેલી હિંસા અને કથિત ગેરકાયદેસર ધર્માંતરણના વિરોધમાં વિવિધ સામાજિક તથા હિન્દુ સંગઠનો દ્વારા બુધવારે રાજ્યવ્યાપી બંધનું એલાન આપવામાં આવ્યું હતું. બંધની અસર રાજ્યના અનેક વિસ્તારોમાં સવારથી જ જોવા મળી, જેમાં રાયપુર, કાંકેર, દુર્ગ, જગદલપુર અને બિલાસપુર જેવા મુખ્ય શહેરોમાં બજારો, વ્યાવસાયિક સંસ્થાઓ અને શાળાઓ મોટા ભાગે બંધ રહ્યા હતા. જાહેર પરિવહન પર પણ વ્યાપક અસર પડી હતી, જેના કારણે સામાન્ય જનતાને આવન-જાવનમાં મુશ્કેલીનો સામનો કરવો પડ્યો હતો. અનેક સ્થળોએ રસ્તાઓ સુનસાન દેખાયા હતા અને સુરક્ષાની દ્રષ્ટિએ પોલીસ તંત્ર એલર્ટ પર રાખવામાં આવ્યું હતું.

રાયપુરમાં બંધ દરમિયાન સ્થિતિ ત્યારે વધુ તંગ બની જ્યારે પ્રદર્શનકારીઓ શહેરના પ્રખ્યાત મેગ્નેટો મોલમાં ઘૂસી ગયા હતા. ક્રિસમસની ઉજવણીને ધ્યાનમાં રાખીને કરાયેલી સજાવટ અને સામાનને કાર્યકરોએ ફેંકી દીધો હતો અને મોલની અંદર તોડફોડ કરી હતી, જેના કારણે થોડા સમય માટે અફરાતફરીનો માહોલ સર્જાયો હતો. ઘટનાની જાણ થતાં જ તેલીબાંધા પોલીસનો કાફલો તાત્કાલિક ઘટનાસ્થળે પહોંચી ગયો હતો અને સ્થિતિને કાબૂમાં લેવાનો પ્રયાસ કર્યો હતો. જોકે, મોલ મેનેજમેન્ટ તરફથી આ ઘટનાને લઈને હજુ સુધી કોઈ સત્તાવાર ફરિયાદ નોંધાવવામાં આવી નથી, તેમ છતાં સમગ્ર ઘટનાએ શહેરમાં ચર્ચાનો વિષય ઊભો કર્યો હતો.

બંધના કારણે રાયપુરમાં બસ અને ઓટો રિક્ષા સેવાઓને ભારે અસર થઈ હતી. સર્વ આદિવાસી સમાજના કાર્યકરોએ આંતરરાજ્ય બસ સ્ટેન્ડ પર પહોંચીને બસોની અવરજવર અટકાવી દીધી હતી, જેના કારણે મુસાફરો ફસાયા હતા. આ ઉપરાંત, આમાનાકા વિસ્તારમાં પેટ્રોલ પંપ બંધ કરાવવાના પ્રયાસને લઈને પણ ઘર્ષણની સ્થિતિ સર્જાઈ હતી, જેને પગલે પોલીસને મધ્યસ્થતા કરવી પડી હતી. બીજી તરફ, કાંકેર જિલ્લાના આમાબેડા સ્થિત ઉસેલી ગામમાં ફરી એકવાર હિંસા ભડકી હતી, જ્યાં ઈસાઈ ધર્મ અપનાવનારી એક મહિલા રામબાઈ તારમના ઘર પર ટોળાએ હુમલો કરી તોડફોડ કરી હતી. મહિલાનો આરોપ છે કે તે હિન્દુ ધર્મમાં પાછી આવવા ઈનકાર કરતી હોવાથી તેના ઘરને નિશાન બનાવવામાં આવ્યું છે. આ ઘટનાએ જિલ્લામાં તણાવ વધાર્યો હતો.

ધમતરીમાં સર્વ હિન્દુ સમાજ દ્વારા શહેરના મુખ્ય માર્ગો પર આક્રોશ રેલી કાઢવામાં આવી હતી, જેમાં પ્રદર્શનકારીઓએ ધર્માંતરણ અને જિલ્લા વહીવટીતંત્ર વિરુદ્ધ નારાબાજી કરી હતી. રેલી બાદ પ્રદર્શનકારીઓએ મુખ્યમંત્રીને સંબોધીને પાંચ મુદ્દાઓનું આવેદનપત્ર એસડીએમ કચેરીમાં સુપરત કર્યું હતું અને સમગ્ર મુદ્દે કડક કાર્યવાહી કરવાની માંગ ઉઠાવી હતી. રાજ્યના વિવિધ વિસ્તારોમાં દિવસભર ચાલી રહેલા આ વિરોધ પ્રદર્શનોએ છત્તીસગઢમાં કાયદો-વ્યવસ્થાની સ્થિતિને લઈને ફરી એકવાર ગંભીર ચર્ચા જગાવી છે.