IPL 2025 પહેલા દિલ્હી કેપિટલ્સે કરી મોટી જાહેરાત

IPL 2025 પહેલા દિલ્હી કેપિટલ્સે મોટી જાહેરાત કરી છે. દિલ્હી કેપિટલ્સે આગામી સિઝન માટે ઇંગ્લેન્ડના ભૂતપૂર્વ વ્હાઈટ બોલ કોચ મેથ્યુ મોટને સહાયક કોચ તરીકે નિયુક્ત કર્યા છે. આ નિમણૂક એવા સમયે કરવામાં આવી છે જ્યારે IPL 2025 શરૂ થવામાં 1 મહિનાથી પણ ઓછો સમય બાકી છે. મોટ  ભારતના ભૂતપૂર્વ ક્રિકેટર હેમાંગ બદાનીને મદદ કરશે, જેમને ગયા વર્ષે ઓક્ટોબરમાં દિલ્હી કેપિટલ્સના મુખ્ય કોચ તરીકે નિયુક્ત કરવામાં આવ્યા હતા. મેથ્યુ મોટ ક્રિકેટ ડિરેક્ટર વેણુગોપાલ રાવ અને બોલિંગ કોચ મુનાફ પટેલ સાથે દિલ્હી કેપિટલ્સના સપોર્ટ સ્ટાફમાં જોડાશે.

ઓસ્ટ્રેલિયન મહિલા ક્રિકેટ ટીમ સાથે અત્યંત સફળ કાર્યકાળ પછી, મોટ 2022 માં ઈંગ્લેન્ડની પુરૂષ ટીમના સફેદ બોલના કોચ બન્યા. તેમના કોચિંગ હેઠળ ઓસ્ટ્રેલિયાની મહિલા ટીમે 7 વર્ષમાં બે T20 વર્લ્ડ કપ, એક ODI વર્લ્ડ કપ અને ચાર એશિઝ શ્રેણી જીતી હતી. 2022માં ઓસ્ટ્રેલિયામાં T20 વર્લ્ડ કપનો ખિતાબ જીત્યા બાદ તેણે ગયા વર્ષે જુલાઈમાં ઈંગ્લેન્ડના કોચ પદેથી રાજીનામું આપ્યું હતું.