ઓડિશામાં બાંગ્લાદેશી ઘુસણખોરોને આશ્રય આપનાર ગેંગનો પર્દાફાશ, સિકંદર આલમ પકડાયો; પોલીસે બુલડોઝર ચલાવ્યું

ઓડિશા પોલીસે ગેરકાયદેસર રીતે રહેતા બાંગ્લાદેશી ઘુસણખોરોને આશ્રય આપતી એક સંગઠિત ગેંગનો પર્દાફાશ કર્યો છે. બાંગ્લાદેશીઓનો ઉપયોગ ગેરકાયદેસર પ્રવૃત્તિઓમાં પણ થતો હતો. પોલીસે મુખ્ય આરોપી સિકંદર આલમ ઉર્ફે ‘સેકો’ને ધરપકડ કરી છે.

તાજેતરમાં બહેરામપુર ઝૂંપડપટ્ટીમાં પોલીસ દ્વારા દરોડા પાડવામાં આવ્યા હતા, ત્યારથી સિકંદર સતત છુપાતો ફરતો હતો. અનેક સ્થળોએ શોધખોળ કર્યા બાદ પોલીસએ જાજપુર જિલ્લામાંથી તેની ધરપકડ કરી. પોલીસે સિકંદરનો પાસપોર્ટ અને અનેક શંકાસ્પદ દસ્તાવેજો કબજે કર્યા છે. તેના નાના ભાઈને પણ ગેંગમાં સંડોવણીના આરોપે પકડવામાં આવ્યો છે.

પોલીસની તપાસમાં ખુલ્યું છે કે સિકંદર અને તેના સાથીઓ બાંગ્લાદેશથી ગેરકાયદેસર રીતે ભારત પ્રવેશ કરનારાઓને આશ્રય આપતા હતા. સાથે જ કેટલીક મહિલાઓની તસ્કરી અને શોષણ જેવી ગંભીર ગુનાહિત પ્રવૃત્તિઓ પણ કરવામાં આવતી હતી. આ કાર્યવાહી બાદ જગતસિંહપુર જિલ્લાના વહીવટીતંત્રએ સરકારી જમીન પર ગેરકાયદે બાંધવામાં આવેલા માળખાઓ પર બુલડોઝર ચલાવ્યું હતું.

વહીવટીતંત્ર તેમજ પોલીસે જણાવ્યું છે કે બાંગ્લાદેશી ઘુસણખોરો ઓડિશામાં પ્રવેશવા જે માર્ગોનો ઉપયોગ કરે છે, તે તમામ રૂટ્સ પર કડક નજર રાખવામાં આવી રહી છે. સાથે જ તપાસ ચાલી રહી છે કે સિકંદર આલમને આ ગેંગ ચલાવવા માટે વિદેશમાંથી નાણાકીય મદદ મળતી હતી કે નહીં.

કેન્દ્રના ગૃહ મંત્રાલયે તમામ રાજ્યોને દેશમાં રહેતા બાંગ્લાદેશ અને મ્યાનમારના ગેરકાયદેસર પ્રવાસીઓ વિરુદ્ધ કડક કાર્યવાહી કરવા સૂચના આપી છે. ઓડિશાના મુખ્યમંત્રીએ પણ પોલીસ અને વહીવટીતંત્રને રાજ્યમાં ગેરકાયદેસર રીતે વસેલા લોકો સામે ઝડપી અને કડક પગલાં લેવા આદેશ આપ્યો છે.