બેંગ્લુરુમાં અલગ રહેતી પત્નીની ગોળી મારી હત્યા, પતિએ પોલીસ સ્ટેશનમાં કર્યું આત્મસમર્પણ

બેંગ્લુરુમાંથી એક હચમચાવી નાખતી ઘટના સામે આવી છે. મંગળવારે સાંજે એક 40 વર્ષીય સોફ્ટવેર એન્જિનિયરે તેની અલગ રહેતી પત્નીને ગોળી મારીને હત્યા કરી હતી.

ગોળીબાર બાદ આરોપી પોતે જ પોલીસ સ્ટેશન પહોંચ્યો અને આત્મસમર્પણ કર્યું. એક વરિષ્ઠ પોલીસ અધિકારીએ આ ઘટનાની પુષ્ટિ કરી છે. આ ઘટનાએ શહેરમાં સુરક્ષા અને ઘરેલુ વિવાદોની ગંભીરતા અંગે ફરી એકવાર ચર્ચા જગાવી છે.

પોલીસના જણાવ્યા મુજબ, મૃતક ભુવનેશ્વરી (ઉંમર 39) યુનિયન બેંક ઓફ ઈન્ડિયાની બસવેશ્વરનગર બ્રાન્ચમાં આસિસ્ટન્ટ મેનેજર તરીકે ફરજ બજાવતી હતી. મંગળવારે સાંજે કામ પરથી ઘરે પરત ફરતી વખતે આરોપી પતિ બાલામુરુગને તેને મગાડી રોડ નજીક સાંજે લગભગ 6:30થી 7:00 વાગ્યાની વચ્ચે અટકાવી હતી. ત્યારબાદ તેણે નજીકથી પિસ્તોલ વડે ફાયરિંગ કર્યું હતું, જેમાં ભુવનેશ્વરીને ચાર ગોળીઓ વાગી હતી. ગંભીર રીતે ઘાયલ થયેલી ભુવનેશ્વરીને તાત્કાલિક શાનબાગ હોસ્પિટલ લઈ જવામાં આવી હતી, પરંતુ હોસ્પિટલ પહોંચતા જ ડોક્ટરોએ તેને મૃત જાહેર કરી હતી.

પોલીસ તપાસમાં જાણવા મળ્યું છે કે બાલામુરુગન અને ભુવનેશ્વરીના લગ્ન વર્ષ 2011માં થયા હતા અને બંનેને બે સંતાન છે. જોકે લગ્નજીવનમાં લાંબા સમયથી અણબનાવ ચાલતો હતો, જેના કારણે છેલ્લા 18 મહિનાથી બંને અલગ રહેતા હતા. પોલીસે જણાવ્યું કે આરોપીને પત્નીના ચારિત્ર્ય અંગે શંકા હતી. આ કારણે ભુવનેશ્વરી છ મહિના પહેલા વ્હાઇટફિલ્ડ છોડીને રાજાજીનગરમાં રહેવા ગઈ હતી. તેમ છતાં, બાલામુરુગને તેનો સરનામું શોધી કાઢ્યું અને તેના પર નજર રાખવા માટે ચાર મહિના પહેલા કેપી અગ્રહારા પોલીસ હદ હેઠળ આવતા ચોલુરપાલ્યામાં રહેવા લાગ્યો હતો.

વેસ્ટ ડિવિઝનના ડીસીપી એસ. ગિરીશે જણાવ્યું કે આરોપી અગાઉ એક ખાનગી આઈટી કંપનીમાં કામ કરતો હતો, પરંતુ છેલ્લા ચાર વર્ષથી બેરોજગાર હતો. હત્યાથી એક અઠવાડિયા પહેલા તેણે ભુવનેશ્વરીને છૂટાછેડા માટે કાનૂની નોટિસ પણ મોકલી હતી. બંને દંપતી તમિલનાડુના સેલમ જિલ્લાના મૂળ રહેવાસી હોવાનું પણ પોલીસ તપાસમાં સામે આવ્યું છે.

હત્યાને અંજામ આપ્યા બાદ બાલામુરુગન મગાડી રોડ પોલીસ સ્ટેશન ગયો હતો, જ્યાં તેણે પોતાનો ગુનો કબૂલ કરી લીધો અને હત્યામાં વપરાયેલ પિસ્તોલ પણ પોલીસને સોંપી દીધી હતી. પોલીસે આરોપી વિરુદ્ધ BNS એક્ટની કલમ 103 હેઠળ હત્યાનો કેસ નોંધ્યો છે અને સમગ્ર મામલે વધુ તપાસ શરૂ કરી છે.