ભારત-અમેરિકા ટ્રેડ ડીલ નજીક? 50% ટેરિફ ઘટીને 20% થવાની સંભાવનાએ બજારમાં ઉત્સાહ

ભારત અને અમેરિકા વચ્ચેના વેપાર કરાર અંગેની ચર્ચાઓ છેલ્લા ઘણા સમયથી ચાલતી આવી રહી છે.

છ રાઉન્ડની વાતચીત બાદ પણ અંતિમ નિર્ણય ન આવ્યો હોવા છતાં, બંને દેશો વચ્ચે સકારાત્મક ડીલ થવાની શક્યતાઓ વધી રહી છે. અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ વારંવાર જાહેરમાં દાવો કરે છે કે ભારત સાથે 'મેજર ટ્રેડ ડીલ' લગભગ તૈયાર છે. હવે આંતરરાષ્ટ્રીય બ્રોકરેજ ફર્મ નોમુરાએ પણ પોતાના નવા અહેવાલમાં આ સંકેત આપ્યો છે કે ડીલ ટૂંક સમયમાં ફાઇનલ થવાની પૂરી આશા છે.

જો આ કરાર થઈ જાય, તો અમેરિકા હાલમાં ભારત પર લગાવતો 50 ટકા સુધીનો હાઈ ટેરિફ ઘટીને લગભગ 20 ટકા સુધી આવી શકે છે, જે ભારત માટે મોટો વેપારી લાભ સાબિત થશે. શેરબજારનાં વિશ્લેષકોનો પણ અંદાજ છે કે આ ડીલ 2025ના અંત સુધીમાં પૂરી થઈ શકે છે, જે ભારત-અમેરિકા આર્થિક સંબંધોમાં નવી ગતિ લાવશે.

ભારતના આર્થિક પ્રદર્શન અંગે નોમુરાએ તેના અહેવાલમાં કહ્યું છે કે સપ્ટેમ્બર ત્રિમાસિકમાં દેશનો GDP ગ્રોથ રેટ 8.2% રહ્યો, જે જૂન ત્રિમાસિકના 7.8%ના મુકાબલે વધારે સારો છે. RBIના 7%ના અંદાજ કરતાં પણ આ વૃદ્ધિ નોંધપાત્ર ઊંચી છે. આ મજબૂત વૃદ્ધિને ધ્યાનમાં રાખીને નોમુરાએ નાણાકીય વર્ષ 2026 માટે GDP ગ્રોથનો અંદાજ 7%થી વધારી 7.5% કર્યો છે.

રેપો રેટ અંગે બ્રોકરેજનું માનવું છે કે સશક્ત આર્થિક વૃદ્ધિ હોવા છતાં, તેઓ RBI ડિસેમ્બર MPC બેઠકમાં 25 બેસિસ પોઇન્ટના વ્યાજદર ઘટાડાને જાળવી રાખશે. જો આવું થાય, તો રેપો રેટ 5.25% પર આવી જશે. જોકે રેપો રેટમાં ઘટાડાની સંભાવના 65%થી ઘટાડી 60% કરી છે.

અહેવાલમાં એવું પણ જણાવાયું છે કે ભારતની અર્થવ્યવસ્થા હાલ મજબૂત આધાર પર આગળ વધી રહી છે. ઓછું ફુગાવું, GST સુધારા, શ્રમ કાયદાઓમાં સરળતા અને મજબૂત આંતરિક માંગ જેવી બાબતો ભારતના વિકાસને વધારે ગતિ આપશે. વેપાર કરાર ફાઇનલ થાય તો ભારતને નિકાસ, ઉદ્યોગ અને મૂડી રોકાણના ક્ષેત્રોમાં વિશાળ ફાયદો થવાની પૂરી શક્યતા છે.