6 વર્ષ પછી આજથી કૈલાશ માનસરોવર યાત્રાનો પ્રારંભ..!

શિવભક્તોની લાંબી રાહ આખરે પૂરી થઈ છે. લગભગ 6 વર્ષ પછી, આજથી (30 જૂન) ફરી એકવાર કૈલાશ માનસરોવર યાત્રા શરૂ થઈ છે. એવું કહેવાય છે કે માનસરોવર બ્રહ્માના મનમાંથી બનેલું છે અને અહીંથી સરયુ, સતલજ, સિંધુ અને બ્રહ્મપુત્ર જેવી મુખ્ય નદીઓ નીકળે છે. આ સરોવર લગભગ 15,100 ફૂટની ઊંચાઈ પર સ્થિત એક મીઠા પાણીનું તળાવ છે, જેનો મુખ્ય સ્ત્રોત કૈલાશ છે.આ યાત્રા પહેલા કોવિડ રોગચાળાને કારણે અને પછી ગલવાન ઘાટી પર ભારત અને ચીન વચ્ચેના સંઘર્ષને કારણે બંધ કરવામાં આવી હતી.

વિદેશ મંત્રાલય દર વર્ષે જૂનથી સપ્ટેમ્બર દરમિયાન બે અલગ અલગ રૂટ પર કૈલાસ યાત્રાનું આયોજન કરે છે. આમાં પહેલો રૂટ લિપુલેખ પાસ (ઉત્તરાખંડ)માંથી પસાર થાય છે અને બીજો રૂટ નાથુ લા પાસ (સિક્કિમ)માંથી પસાર થાય છે. આમાં મુસાફરે કોઈ એક રૂટ પસંદ કરવાનો હોય છે. કૈલાસ માનસરોવર યાત્રા તેના ધાર્મિક મૂલ્ય અને સાંસ્કૃતિક મહત્વ માટે જાણીતી છે. ભગવાન શિવના નિવાસસ્થાન તરીકે હિન્દુઓ માટે મહત્વપૂર્ણ હોવાથી, તે જૈન અને બૌદ્ધો માટે પણ ધાર્મિક મહત્વ ધરાવે છે.

કૈલાશ માનસરોવરના ઇચ્છુક ભક્તો http://kmy.gov.inની મુલાકાત લઈને અરજી કરી શકે છે. કૈલાશ માનસરોવરની યાત્રા યાત્રાળુઓ માટે મુશ્કેલ યાત્રા છે. આમાં ભક્તો 'કૈલાશ પરિક્રમા' અથવા 'કાયક્રમ' નામના પર્વતની પરિક્રમા કરે છે. તેને પૂર્ણ કરવામાં લગભગ ત્રણ દિવસ લાગે છે અને તેને ભગવાન શિવની શક્તિનું સન્માન માનવામાં આવે છે. આ માર્ગ અત્યંત પડકારજનક છે, કારણ કે ઊંચાઈ અને હવામાન ઘણીવાર યાત્રાળુઓ માટે મુશ્કેલીઓનું કારણ બને છે.