કર્ણાટક રોડ દુર્ઘટના: IAS મહંતશ બિલાગી અને બે ભાઈઓનું કરુણ મૃત્યુ

કર્ણાટકના કલબુર્ગી જિલ્લામાં મંગળવાર, 25 નવેમ્બરે થયેલા ભયંકર માર્ગ અકસ્માતે એકજ પરિવારના ત્રણ સભ્યોનું અવસાન થતાં સમગ્ર રાજ્યમાં શોક છવાઈ ગયો છે.

 મૃતકોમાં 2012 બેચના 51 વર્ષીય પ્રખર IAS અધિકારી મહંતશ બિલાગી સામેલ છે, જે કર્ણાટક રાજ્ય ખનીજ નિગમના મેનેજિંગ ડિરેક્ટર તરીકે કાર્યરત હતા. તેમની સાથે પ્રવાસ કરી રહેલા 55 વર્ષીય શંકર બિલાગી અને 53 વર્ષીય ઈરન્ના બિલાગી—બન્ને તેમના ભાઈઓ—પણ આ અકસ્માતમાં કાળના ગ્રાસ બન્યા.

તપાસ મુજબ, વિજયપુરાથી કલબુર્ગી તરફ જઈ રહેલી તેમની ઇનોવા કાર જેવાર્ગી તાલુકાના ગૌનલ્લી ક્રોસ પાસે અચાનક નિયંત્રણ ગુમાવતા જોખમી રીતે પલટી ગઈ હતી. અકસ્માત એટલો ગંભીર હતો કે શંકર અને ઈરન્નાનો ઘટનાસ્થળે જ મોત નિપજ્યું, જ્યારે મહંતશને સ્થાનિક ખાનગી હોસ્પિટલમાં લઈ જવાયા છતાં તેમને બચાવી શકાયા નહોતાં. કાર ચાલકને સામાન્ય ઇજાઓ થઈ છે અને તેની સારવાર ચાલુ છે.

મહંતશ બિલાગી બેલગાવી જિલ્લાના રામદુર્ગના રહેવાસી હતા અને તેમની ગણના કર્ણાટકના સૌથી સમજદાર, કાર્યકુશળ અને ઈમાનદાર અધિકારીઓમાં થતી હતી. તેમણે ઉડુપ્પી, દાવણગેરે અને ચિત્રદુર્ગ સહિત અનેક જિલ્લાઓમાં મહત્વપૂર્ણ પદો પર સેવા આપી હતી.

ખનીજ નિગમમાં એમડી તરીકે નિમણૂક થવા પૂર્વે તેઓ બેસ્કોમના મેનેજિંગ ડિરેક્ટર પણ રહ્યા હતા, જ્યાં તેમના કાર્યને વિશેષ વખાણ મળ્યા હતા. એક જ અકસ્માતે રાજ્યને એક પ્રતિભાશાળી અધિકારી અને તેમના બે ભાઈઓ ગુમાવવાના આઘાતમાં મૂકી દીધું છે. પરિવારજનોથી લઈને સરકારી તંત્ર સુધી દરેક સ્તરે શોકની લાગણી છવાઈ ગઈ છે, અને સમગ્ર ઘટનાએ કર્ણાટકના વહીવટી તંત્રમાં ઊંડો ખાલીપો ઉભો કર્યો છે.