લેફ્ટનન્ટ ગવર્નરના પાવર કાપ્યા, લદાખના પ્રોજેક્ટની મંજૂરી હવે કેન્દ્ર પાસે

કેન્દ્રીય ગૃહ મંત્રાલયે લદાખના વહીવટી તંત્રમાં એક મહત્વપૂર્ણ અને દૂરગામી નિર્ણય કર્યો છે, જેના અંતર્ગત લેફ્ટનન્ટ ગવર્નર સહિત ઊંચા દરજ્જાના વહીવટી અધિકારીઓ પાસે રહેલી નાણાકીય સત્તાઓ પાછી ખેંચી લેવામાં આવી છે.

અત્યાર સુધી લેફ્ટનન્ટ ગવર્નર પાસે 100 કરોડ રૂપિયા સુધીની યોજનાઓ અને પ્રોજેક્ટોને મંજૂરી આપવાનો અધિકાર હતો, પરંતુ નવી વ્યવસ્થામાં આ સત્તા સીધી ગૃહ મંત્રાલય પાસે રહેશે. આ નિર્ણયને કારણે પ્રદેશમાં વહીવટી માળખામાં મોટો ફેરફાર આવ્યો છે અને અનુમાન છે કે હવે મોટા પ્રોજેક્ટો અને વિકાસ યોજનાઓ માટે કેન્દ્રનું નિયંત્રણ વધુ મજબૂત બનશે.

મંત્રાલયના આ નિર્ણયથી માત્ર લેફ્ટનન્ટ ગવર્નરની સત્તા જ નહીં, પરંતુ વહીવટી સચિવ, ચીફ એન્જિનિયર, ડેપ્યુટી કમિશનર, સુપરિટેન્ડન્ટ એન્જિનિયર જેવા વિભાગીય વડાઓની નાણાકીય મંજૂરી આપવાની શક્તિઓ પણ રદ કરવામાં આવી છે. વહીવટી સચિવ પાસે અત્યાર સુધી 20 કરોડ રૂપિયા સુધીના પ્રોજેક્ટોને મંજૂરી આપવાનો અધિકાર હતો, જ્યારે અન્ય અધિકારીઓ પાસે ત્રણથી દસ કરોડ રૂપિયા સુધીના પ્રોજેક્ટોને હરી ઝંડી આપવાની સત્તા હતી. આ તમામ અધિકાર હવે પાછા ખેંચી લઈને ગૃહ મંત્રાલયને સોંપવામાં આવ્યા છે, જેથી લદાખમાં નાણાકીય નિર્ણયોનું કેન્દ્રિકરણ વધુ વેગ પામ્યું છે.

આ બદલાવ બાદ લદાખના લેફ્ટનન્ટ ગવર્નર કવિંદર ગુપ્તાએ સત્તાવાર ઓર્ડર જાહેર કર્યો છે, જેમાં સ્પષ્ટ કરાયું છે કે હવે પબ્લિક પ્રાઈવેટ પાર્ટનરશિપ (PPP) મોડલ હેઠળ 100 કરોડ રૂપિયા સુધીની કોઈપણ યોજના કે પ્રોજેક્ટ માટે મંજૂરી સીધા ગૃહ મંત્રાલય આપશે. એટલે કે, અગાઉ લેફ્ટનન્ટ ગવર્નર અથવા વહીવટી સચિવ દ્વારા આપાતી વહીવટી મંજૂરીઓ માટે હવે કેન્દ્ર સરકારની મંજૂરી ફરજિયાત બની ગઈ છે. આ પગલું વહીવટી પ્રક્રિયાને વધુ કેન્દ્રીકૃત બનાવે છે અને સાથે જ નીતિગત નિયંત્રણ કેન્દ્ર સરકારને સોંપે છે.