લિયોનેલ મેસીના કોલકતા ઈવેંન્ટમાં મચી અફરા તફરી, દર્શકોએ તોડફોડ કરી

આર્જેન્ટિનાના દિગ્ગજ ફૂટબોલ સ્ટાર લિયોનેલ મેસ્સી ત્રણ દિવસના પ્રવાસે ભારત આવ્યા હતા, પરંતુ કોલકાતાના સોલ્ટ લેક સ્ટેડિયમમાં જે બન્યું તે દેશ માટે ગૌરવની જગ્યાએ શરમજનક સાબિત થયું. કોલકાતા લીગના ભાગરૂપે મેસ્સીના GOAT ટૂર દરમિયાન આયોજિત વિશેષ ઉજવણી અચાનક રદ કરવી પડી અને સુરક્ષા કારણોસર મેસ્સીને માત્ર 10 મિનિટમાં જ સ્ટેડિયમ છોડવું પડ્યું. જે પ્રસંગ ભારતીય ફૂટબોલ ચાહકો માટે ઐતિહાસિક બનવાનો હતો, તે અવ્યવસ્થાઓ અને ગેરવહીવટને કારણે નિરાશામાં ફેરવાઈ ગયો.

મેસ્સીના સોલ્ટ લેક સ્ટેડિયમમાં આગમન સાથે જ પરિસ્થિતિ ઝડપથી કાબૂ બહાર ગઈ. સ્ટેડિયમની અંદર ચાહકોમાં ભારે અંધાધૂંધી સર્જાઈ હતી.

કેટલાક દર્શકોએ મેદાન તરફ પાણીની બોટલો ફેંકી હતી તો ક્યાંક તંબુઓ ઉખેડી નાખવામાં આવ્યા હતા. મીડિયા અહેવાલો અનુસાર, આયોજકો દ્વારા પ્રવેશ વ્યવસ્થા, બેઠકો અને સુરક્ષા આયોજનમાં ગંભીર ખામીઓ હતી. મેસ્સીને જોવા માટે આવેલા હજારો ચાહકો માટે યોગ્ય વ્યવસ્થા ન હોવાને કારણે ગુસ્સો ફાટી નીકળ્યો અને થોડા જ સમયમાં સમગ્ર કાર્યક્રમ અવ્યવસ્થિત બની ગયો.

પરિસ્થિતિ વણસતા સુરક્ષા એજન્સીઓએ તરત જ નિર્ણય લીધો અને મેસ્સીને મુખ્ય ગેટના બદલે અન્ય ગેટ દ્વારા બહાર લઈ જવાયો. માત્ર 10 મિનિટમાં જ મેસ્સી સ્ટેડિયમ છોડી ગયો, જેના કારણે કલાકો સુધી રાહ જોનારા ચાહકો નિરાશ થઈ ગયા. સોશિયલ મીડિયા પર વાયરલ થયેલા વીડિયો અને તસવીરોમાં સ્પષ્ટ દેખાતું હતું કે કેવી રીતે એક યાદગાર ક્ષણ ગેરવહીવટ અને આયોજનની નિષ્ફળતાને કારણે બગડી ગઈ. ઘણા ચાહકોએ ખુલ્લેઆમ આરોપ લગાવ્યો કે કાર્યક્રમમાં સામાન્ય ટિકિટધારકોને અવગણવામાં આવ્યા અને મોટા ભાગે સેલિબ્રિટીઓને જ મેસ્સી સુધી પહોંચવાની તક આપવામાં આવી.

આ ઘટનાને લઈને અનેક ચાહકોએ આયોજકો સામે ગંભીર આક્ષેપો કર્યા છે. કેટલાકે કહ્યું કે તેઓ મહિનાઓથી આ દિવસની રાહ જોઈ રહ્યા હતા, ટિકિટ ખરીદી હતી, પરંતુ મેસ્સીની એક ઝલક પણ જોવા મળી નહીં. અપેક્ષાઓ પૂરી ન થતાં ઘણા લોકોએ આ સમગ્ર કાર્યક્રમને કૌભાંડ ગણાવ્યો છે. ભારતીય ફૂટબોલ માટે આ એક મોટું અવસર હતું, પરંતુ અવ્યવસ્થાઓએ દેશની આંતરરાષ્ટ્રીય પ્રતિષ્ઠા પર પણ સવાલ ઊભા કર્યા છે.

આ બધાની વચ્ચે, મેસ્સીએ કોલકાતામાં બોલિવૂડ અભિનેતા શાહરૂખ ખાન સાથે મુલાકાત કરી હતી. કાર્યક્રમ દરમિયાન શાહરૂખ ખાનનો નાનો પુત્ર પણ તેમની સાથે હતો અને મેસ્સીએ તેમની સાથે ફોટો પણ પડાવ્યો હતો. આ મુલાકાતના દ્રશ્યો સોશિયલ મીડિયા પર ઝડપથી વાયરલ થયા, પરંતુ સ્ટેડિયમમાં નિષ્ફળ ગયેલી ઉજવણીના કારણે આ મુલાકાત પણ વિવાદોની વચ્ચે છવાઈ ગઈ. સમગ્ર ઘટનાએ સ્પષ્ટ કરી દીધું છે કે વૈશ્વિક સ્તરના ખેલાડીની મુલાકાત માટે મજબૂત આયોજન અને વ્યવસ્થાપન કેટલું જરૂરી છે.