તેલંગાણા ચૂંટણી 2023 : 'તેલંગાણાના લોકો એક રોગને દૂર કરી બીજી બીમારીને સ્વીકારશે નહીં', PM મોદીના કોંગ્રેસ-KCR પર પ્રહાર

તેલંગાણાના પ્રવાસે ગયેલા પીએમ મોદીએ કોંગ્રેસ અને KCRની પાર્ટી પર આકરા પ્રહારો કર્યા હતા. PM એ કહ્યું કે, તેલંગાણાના લોકો KCR સરકારને ઉથલાવી દેવાની તૈયારી કરી રહ્યા છે. મોદીએ કહ્યું કે, હવે તેલંગાણામાં ભાજપનું આગમન નિશ્ચિત છે.

મહબૂબાબાદમાં એક રેલીને સંબોધતા PM મોદીએ કહ્યું કે, કેટલાક લોકો તેલંગાણામાં કોંગ્રેસ વિશે ભ્રમ ફેલાવી રહ્યા છે, પરંતુ સત્ય એ છે કે, કોંગ્રેસ અને KCR તેલંગાણાને બરબાદ કરવામાં સમાન પાપી છે. તેથી, તેલંગાણાના લોકો એક રોગને દૂર કરી શકતા નથી, અને બીજા રોગને પ્રવેશ આપી શકતા નથી. PMએ કહ્યું કે, ભાજપને આશીર્વાદ આપવા માટે તમારું મોટી સંખ્યામાં આવવું એ દર્શાવે છે કે, તેલંગાણા એક નવો ઈતિહાસ રચવા જઈ રહ્યું છે.

PMએ કહ્યું કે, મને એ વાતનો અહેસાસ થયો છે કે, તેલંગાણાના લોકો KCR સરકારને ઉથલાવવાની તૈયારીમાં છે. કોંગ્રેસ અને કેસીઆર બંને પાપી છે, બંને તેલંગાણા રાજ્યને બરબાદ કરી રહ્યા છે. પીએમએ કહ્યું કે, KCR પહેલાથી જ ભાજપની વધતી તાકાતનો અહેસાસ કરી ચૂક્યા છે.

તેમણે કહ્યું કે, લાંબા સમયથી KCR ભાજપ સાથે મિત્રતા કરવાનો પ્રયાસ કરી રહ્યા હતા, જ્યારે તેઓ એકવાર દિલ્હી આવ્યા હતા, ત્યારે KCR મને મળ્યા હતા અને તે જ વિનંતી કરી હતી. પરંતુ ભાજપ તેલંગાણાના લોકોની ઇચ્છા વિરુદ્ધ કંઈ કરી શકે નહીં. PMએ કહ્યું કે, ભાજપે KCRને ના પાડી દીધી છે, ત્યારથી BRS ઉન્માદમાં છે, અને મારી સાથે દુર્વ્યવહાર કરવાનો કોઈ મોકો નથી છોડતો.