દિલ્હી-NCRમાં ઝેરી હવાનો કહેર: AQI 300 પાર થતાં આંખોમાં બળતરા અને શ્વાસ લેવામાં મુશ્કેલી

દિલ્હી-NCRમાં વાયુપ્રદૂષણનો સ્તર ફરી ગંભીર તબક્કે પહોંચી ગયો છે.

સતત વધતા સ્મોગ અને ધૂળના કારણે હવામાં રહેલા ખતરનાક કણોએ એર ક્વોલિટી ઈન્ડેક્સ (AQI)ને 300થી વધુ પહોંચાડી દીધો છે, જે “ખૂબ ખરાબ” શ્રેણીમાં ગણાય છે. આ ઝેરી હવાના કારણે લોકોમાં આંખોમાં બળતર, લાલાશ, ખંજવાળ અને ગળામાં ચળકાટ જેવી તકલીફો વધી રહી છે. શ્વાસ લેવામાં તકલીફ અને દૃશ્યતા ઘટવાથી રોજિંદી જિંદગી પણ પ્રભાવિત થઈ રહી છે.

પર્યાવરણ વિભાગના આંકડા મુજબ, દિલ્હીના અક્ષરધામ વિસ્તારમાં AQI 322 નોંધાયું છે, જ્યારે આનંદ વિહાર વિસ્તારમાં 329 અને કર્તવ્ય પથ પર 300થી ઉપર AQI નોંધાયું છે. લોધી રોડ પર AQI થોડું ઓછું એટલે કે 229 હતું, પરંતુ હજી પણ દૃશ્યતા ઘણી ઓછી હતી. નિષ્ણાતોના જણાવ્યા મુજબ, પ્રદૂષિત હવામાં રહેલા સૂક્ષ્મ કણો આંખોની ભેજ શોષી લે છે, જેના કારણે સૂકાશ અને બળતર વધે છે. લાંબા સમય સુધી આ અસર રહે તો કોર્નિયા ઇન્ફેક્શન અને એલર્જી થવાની શક્યતા વધી જાય છે. બાળકો, વૃદ્ધો અને પહેલેથી આંખોની તકલીફ ધરાવતા લોકોએ ખાસ ધ્યાન રાખવું જોઈએ.

રાહત મેળવવા માટે નિષ્ણાતોએ સલાહ આપી છે કે અનાવશ્યક બહાર ન નીકળવું, બહાર જવું પડે તો UV પ્રોટેક્શન ચશ્માનો ઉપયોગ કરવો અને આંખોને વારંવાર ઠંડા પાણીથી ધોવી જોઈએ. ડૉક્ટરની સલાહથી આર્ટિફિશિયલ ટીર્સ અથવા આઈ ડ્રોપનો ઉપયોગ કરીને આંખોની ભેજ જાળવી રાખવી જોઈએ. ઘરમાં એર પ્યુરિફાયર અથવા કુદરતી શુદ્ધિકારક છોડ, જેમ કે એલોઇવેરા અને સ્નેક પ્લાન્ટ લગાવવાથી હવા શુદ્ધ રાખવામાં મદદ મળે છે. સાથે જ આહારમાં વિટામિન A અને C ધરાવતા ખોરાક – જેમ કે ગાજર, પપૈયો, લીંબુ અને લીલા શાકભાજી ઉમેરવા જોઈએ.

વિશેષજ્ઞોના મતે, પ્રદૂષણ સામે લડવા માટે વ્યક્તિગત નહીં પરંતુ સામૂહિક પ્રયત્નો જરૂરી છે. વાહનોનો ઓછો ઉપયોગ, કારપૂલિંગ, વૃક્ષારોપણ અને સરકારના માર્ગદર્શનોનું પાલન દરેક નાગરિકનું ફરજિયાત કર્તવ્ય છે. એકતાથી જ દિલ્હી-એનસીઆર ફરીથી સ્વચ્છ હવા અને સ્વસ્થ જીવન તરફ આગળ વધી શકે છે.