મહિલાએ ઈર્ષ્યામાં 4 નિર્દોષના જીવ લીધા, પાણીમાં ડૂબાડીને માર્યા

હરિયાણાના પાણીપતમાં સામે આવેલી આ ઘટનાએ સમગ્ર વિસ્તારને હચમચાવી દીધો છે, જેમાં પૂનમ નામની મહિલાએ માત્ર સુંદરતાની બીમાર ઈર્ષ્યાને કારણે ચાર નિર્દોષ બાળકોનું જીવન છીનવી લીધું.

પોલીસે ધરપકડ બાદની પૂછપરછમાં બહાર આવ્યું કે પૂનમને કોઈ પણ બાળક તેની દીકરી અથવા તેના દીકરા કરતાં વધુ સુંદર લાગે તે સહન થતું નહોતું.

આ માનસિક વિકૃતિ એટલી ભયાનક હતી કે તેણે બાળકોને નિશાન બનાવી તેમની હત્યા સુધી કરી નાખી. વર્ષ 2023માં સોનીપતના બોહડ ગામમાં તેની પહેલી ક્રૂર હરકત જોવા મળી હતી, જ્યાં તેણે પોતાની નણંદની નાની દીકરીને બાથરૂમમાં લઈ જઈ પાણીમાં ડૂબાડી મારી નાખી હતી. પરિવારજનોએ આ ઘટનાને સામાન્ય અકસ્માત માન્યો, પણ પૂનમને અંદરથી ડર હતો કે કદાચ કોઈ શંકા કરશે, તેથી શંકાને દૂર કરવા તેણે એક વધુ દાનવી પગલું ભર્યું—પોતાના જ ત્રણ વર્ષના દીકરાને એ જ રીતે પાણીમાં ડૂબાડી મારી નાખ્યો અને પછી પાગલની જેમ રડીને પરિવારને દગો આપ્યો.

પૂનમની ઈર્ષ્યાનું દાનવ અહીં અટકી ગયું ન હતું. વર્ષ 2025માં તેણે ફરીથી વ્યૂહરચના બનાવી અને આ વખત નિશાન બન્યું તેના ભાઈની નાની દીકરી, જેની સુંદરતા તેને ચીડવતી હતી. તેણે પોતાનાં પિયરમાં રહેતી આ માસૂમ ભત્રીજીને પાણીમાં ડૂબાડી મોતને ઘાટ ઉતારી દીધી. આ ત્રણ હત્યાઓ પછી પણ પૂનમ ક્રૂરતાની ચરમસીમા પર પહોંચી ગઈ હતી, જેનો અંત 1 ડિસેમ્બર, 2025ના રોજ આવ્યો.

પાણીપતના નૌલ્થા ગામમાં એક લગ્ન પ્રસંગ દરમિયાન તે પોતાની જેઠાણીની છ વર્ષની દીકરી વિધિને ટબમાં રમવાનું કહી ત્યાં લઈ ગઈ અને તેનું માથું પાણીમાં દબાવી દીધું. પરંતુ આ વખતે તેનો દાવ નિષ્ફળ ગયો, કારણ કે ટબ માત્ર એક ફૂટ ઊંડું હોવા છતાં બાળકીના પગ બહાર હતા, જે ઘટનાને શંકાસ્પદ બનાવતું હતું.

તપાસ દરમિયાન પોલીસના હાથ પૂનમ સુધી પહોંચ્યા અને 36 કલાકની પૂછપરછ બાદ તેણે ચારેય હત્યાઓનો કબૂલનામું આપ્યું. પૂનમે કહ્યું કે દરેક હત્યા બાદ તેને એક પ્રકારની ‘જીત’ની અજીબ અનુભૂતિ થતા હતી—જે તેની માનસિક સ્થિતિ કેટલી વિકૃત થઈ ચૂકી હતી, તે દર્શાવે છે. હાલ પૂનમને ન્યાયિક કસ્ટડીમાં મોકલી દેવામાં આવી છે અને તપાસ ચાલી રહી છે કે કોઈ વધુ બાળક પણ તેની ઈર્ષ્યા અને નિર્દયતાનો ભોગ બન્યું છે કે નહીં.