ISRO વધુ એક મોટી સિદ્ધિ કરશે હાંસલ, ESAનું સોલર મિશન કરશે લોન્ચ

4 ડિસેમ્બરે ISRO વધુ એક મોટી સિદ્ધિ હાંસલ કરવા જઈ રહ્યું છે. પ્રોબા-3ને 4 ડિસેમ્બરે સાંજે 4 વાગ્યે શ્રીહરિકોટાના સતીશ ધવન સ્પેસ સેન્ટરથી લોન્ચ કરવામાં આવશે. ખાસ વાત એ છે કે યુરોપિયન સ્પેસ એજન્સીના આ સોલાર મિશનને ઈસરોના પીએસએલવી રોકેટથી લોન્ચ કરવામાં આવશે. 

યુરોપિયન સ્પેસ એજન્સી (ESA)ની પ્રોબા સીરિઝનું આ ત્રીજું સૌર મિશન છે, આ પહેલા ઈએસએનું પ્રોબા-1 પણ વર્ષ 2001માં ઈસરોએ લોન્ચ કર્યું હતું. જ્યારે પ્રોબા-2 2009માં લોન્ચ કરવામાં આવ્યું હતું. પ્રોબા-3 મિશન માટે સ્પેન, બેલ્જિયમ, પોલેન્ડ, ઇટાલી અને સ્વિટ્ઝર્લેન્ડની ટીમો કામ કરી રહી છે.

યુરોપિયન સ્પેસ એજન્સીના પ્રોબા-3 મિશનનો ખર્ચ લગભગ 1780 કરોડ રૂપિયા છે, જેનું આયુષ્ય લગભગ 2 વર્ષનું હશે. તેને 600 બાય 60530 કિલોમીટરની લંબગોળ ભ્રમણકક્ષામાં મોકલવામાં આવશે, જેનો ભ્રમણકક્ષાનો સમયગાળો લગભગ 19.7 કલાકનો હશે.

પ્રોબા-3 મિશનને એવી રીતે ડિઝાઇન કરવામાં આવ્યું છે કે જેમાં બે સેટેલાઇટને એક સાથે લોન્ચ કરવામાં આવશે, જે એકબીજાથી અલગ ઉડાન ભરશે પરંતુ સૂર્યની આસપાસ તેમની ભ્રમણકક્ષામાં સુમેળથી કામ કરશે. બંને ઉપગ્રહો સોલાર કોરોનોગ્રાફ બનાવશે, જેથી સૂર્યમાંથી નીકળતા તીવ્ર પ્રકાશને વાતાવરણમાં રોકી શકાય.