ગુજરાતીઓની પસંદ સ્વાદિષ્ટ ઊંધિયુ, જાણો તેની બનાવવાની રીત

ઊંધિયું એ ગુજરાતી ડિશ છે. ઊંધિયા વગર ગુજરાતીઓ અધૂરા એમ કહીયે તો ચાલે. ઊંધિયાનું નામ સાંભળતા જ મોઢામાં પાણી આવી જાય. ખાસ કરીને ઉતરાયણના તહેવારમાં દરેક લોકો ઊંધિયું બનાવતા હોય છે.હવે તો માર્કેટમાં પણ અવનવી જાતના ઊંધિયા મળે છે. તો ચાલો આપણે પણ આજે આ ઊંધિયું કેવી રીતે બને એની રીત જાની લઈએ :

 ઊંધિયું બનાવવા માટેની સામગ્રી :

-આદુ મરચાની પેસ્ટ 1 ચમચી- પાપડી- 500 ગ્રામ -રતાળુ- 250 ગ્રામ, શક્કરિયા 250 ગ્રામ, લીલી તુવેર-200 ગ્રામ, બટાકા -250 ગ્રામ, લીલા ધાણા 100 ગ્રામ, લીલુ લસણ - 50 ગ્રામ, ધાણાજીરુ - બે ચમચી, ભરવા રીંગણ(નાના) 200 ગ્રામ, મીઠુ સ્વાદ મુજબ, કોઈ પણ શાકના મુઠિયા એક વાડકો. ધાણા પાઉડર 2 ટેબલ સ્પૂન, મીઠું સ્વાદ અનુસાર, વાટેલા તલ 50 ગ્રામ, લીલા વટાણા (વાટેલા)500 ગ્રામ, 100 ગ્રામ લીલા કોપરાનું ખમણ, બે ચમચી ખાંડ, એક ચમચી અજમો, અડધી ચમચી ઊંધિયાનો અથવા તો શાકનો ગરમ મસાલો 

 ઊંધિયું બનાવવાની રીત : 

એક મોટા જાડા તળિયાના તપેલામાં ચાર પળી તેલ ગરમ કરો હવે વાટેલા લીલાં મરચાં, જીરુ, વાટેલું આદુ, કોથમીર, સમારેલું લીલું લસણ, થોડો ધાણા પાવડર, સ્વાદ અનુસાર મીઠું, વાટેલા તલ, લીલા નાળિયેરનું ખમણ, થોડી ખાંડ, ગરમ મસાલો બધી સામગ્રી એક બાઉલમાં મિક્સ કરી લો. તેલ ગરમ થયા બાદ અજમાનો વઘાર કરો. વઘાર થાય એટલે તેમાં સાફ કરીને ધોયેલી પાપડીને નાખી દ્યો . થોડો સોડા અને થોડું મીઠું નાખીને ચૂલા પર પાંચ મિનિટ સુધી થવા દો. ત્યારબાદ તેની અંદર કાંપા પાડેલા શક્કરિયાં-બટાકા-રીંગણ-રતાળુમાં બાઉલમાં પ્રથમથી તૈયાર કરેલો મસાલો ભરવો અને પાપડીની અંદર ગોઠવીને મૂકી દેવું. ત્યારબાદ તેની ઉપર એક થાળીમાં થોડું પાણી મૂકીને ઢાંકી દેવું, જેથી તપેલામાં ચોંટી ન જાય. થોડી થોડી વારે આને હલાવી લેવું. શાક ચઢી જાય ત્યારબાદ ગેસ બંધ કર્યા પછી તૈયાર મુઠિયાને ગોઠવી દેવા. તપેલાને ઢાંકણું ઢાંકી દેવું. 15 મિનિટ આ શાકને તપેલામાં જ ઢાંકેલું રાખીને કોપરું-કોથમીર-લીલું લસણ ઉપરથી ભભરાવીને પીરસવુ. તો તૈયાર છે આપનું સ્વાદિષ્ટ અને મન લોભાવે એવું ઊંધિયું. પીરસો અને જયાફત ઉડાવો.