ઘરે બનાવો ક્રિસ્પી બેસન કટોરી ચાટ, સાંજની ભૂખ માટે પરફેક્ટ નાસ્તો

ભારતીયો ખાવાના ખૂબ શોખીન છે, અને સાંજના સમયે થતી નાની ભૂખમાં મોટાભાગના લોકો સ્ટ્રીટ ફૂડ તરફ દોડે છે.

પરંતુ બહારનું ખાવાનું હંમેશા સ્વાસ્થ્ય માટે સારું ન હોય, તેથી આજે જાણો એવી સ્વાદિષ્ટ ઘરેલુ રેસીપી જે સ્ટ્રીટ ફૂડના સ્વાદને પણ પાછળ મૂકી દે — બેસન કટોરી ચાટ. 

આ ચાટ બનાવવા માટે સૌથી પહેલા એક મોટા બાઉલમાં ચણાનો લોટ, ચોખાનો લોટ, અજમો, મીઠું, હળદર, લાલ મરચું અને થોડું તેલ ભેળવીને જાડું પરંતુ સુંવાળું ખીરું તૈયાર કરો. 

ત્યારબાદ નાના સ્ટીલના બાઉલના પાછળના ભાગ પર તેલ લગાવી તેને બેસનના ખીરમાં ડુબાડો અને ગરમ તેલમાં મૂકો. જ્યારે તે કડક થવા લાગે, ત્યારે બાઉલ દૂર કરીને બેસનની કટોરીને સોનેરી અને ક્રિસ્પી થાય ત્યાં સુધી તળી લો. આ રીતે તમામ કટોરીઓ તૈયાર કરો અને તેને ટીશ્યુ પેપર પર મૂકી દો જેથી વધારાનું તેલ શોષાઈ જાય.

હવે આ કટોરીઓમાં બાફેલા ચણા કે રાજમા, બટેટા, ઝીણાં સમારેલા ટામેટા અને ડુંગળી નાખો, પછી ચાટ મસાલો, લીંબુનો રસ, દહીં, લીલી ચટણી અને મીઠી આમલીની ચટણી ઉમેરો. અંતમાં સેવ, દાડમના દાણા અને કોથમીરથી સજાવટ કરો. સ્વાદમાં આ ચાટ એટલી મજેદાર બનશે કે તમે બહારની પાણીપૂરી ભૂલી જશો.

આ રેસીપી માત્ર સાંજના નાસ્તા માટે જ નહીં પરંતુ કિટી પાર્ટી કે કોઈ ખાસ પ્રસંગ માટે પણ બેસ્ટ વિકલ્પ છે. વધુમાં, તમે તેને એડવાન્સમાં તૈયાર કરીને ડીનર સમયે સર્વ કરી શકો છો — સ્વાદ, રંગ અને સુગંધથી ભરપૂર આ ચાટ તમારી સાંજને ખાસ બનાવી દેશે.