ઘરે બનાવો હેલ્ધી ઘઉંના લોટના મોમોઝ: બાળકો માટે સ્વાદિષ્ટ અને ફાયદાકારક રેસીપી

મોમોઝ આજકાલ દરેકની મનપસંદ ડિશ બની ગઈ છે, પરંતુ બજારમાં મળતા મોમોઝ મેંદાથી બનતા હોવાથી સ્વાસ્થ્ય માટે હાનિકારક સાબિત થઈ શકે છે.

ખાસ કરીને બાળકો માટે તેનાથી પાચન સંબંધિત સમસ્યાઓ, કોલેસ્ટ્રોલમાં વધારો અને પેટની અસ્વસ્થતા થઈ શકે છે. તેથી ઘરમાં જ ઘઉંના લોટમાંથી હેલ્ધી અને સ્વાદિષ્ટ મોમોઝ બનાવવું સૌથી ઉત્તમ વિકલ્પ છે. ઘઉંના લોટમાં બનાવેલા મોમોઝ હળવા, પાચન માટે સહેલા અને પોષકતાથી ભરપૂર હોય છે.

આ માટે એક કપ ઘઉંનો લોટ લઈ તેમાં મીઠું ઉમેરી નરમ લોટ બાંધી લો અને તેને અડધો કલાક ઢાંકી રાખો. સ્ટફિંગ માટે ઝીણું સમારેલું ગાજર, કોબીજ, શિમલા મરચાં અને લીલી ડુંગળી મિક્સ કરો. તેમાં આદુ, હળદર, લાલ મરચું, ધાણા, જીરું અને કાળા મરીનો પાઉડર ઉમેરો. આ મિશ્રણને સ્વાદ મુજબ મીઠું ઉમેરી સારી રીતે મિક્સ કરો. પછી નાના લુઆ બનાવી મોમોઝના પડ તૈયાર કરો, મધ્યમાં સ્ટફિંગ ભરી કિનારી ચોંટાડી બંધ કરો.

હવે સ્ટીમર કે કૂકરમાં 10-12 મિનિટ સુધી બાફો. મોમોઝ તૈયાર થયા પછી તેમને શેઝવાન સોસ અથવા ટામેટા ચટણી સાથે પીરસો. તમે ઈચ્છો તો તેલમાં હળવા ફ્રાય પણ કરી શકો છો. આ રીતે બનાવેલા ઘઉંના લોટના મોમોઝ બાળકોને તો ગમશે જ, પણ આખા પરિવાર માટે હેલ્ધી અને ટેસ્ટી નાસ્તો સાબિત થશે.