સવારની શરૂઆત કરો બીટરૂટ ચીલાથી: સ્વાદિષ્ટ અને હેલ્ધી નાસ્તો

જો તમે દરરોજ એક જ પ્રકારનો નાસ્તો ખાઈને કંટાળી ગયા છો, તો આજે કંઈક નવું અજમાવી જુઓ બીટરૂટનો ચીલો (Beetroot Chilla).

આ રંગીન અને સ્વાદિષ્ટ વાનગી માત્ર સ્વાદ માટે જ નહીં, પણ આરોગ્ય માટે પણ ઉત્તમ છે. સવારના નાસ્તામાં આ ચીલો શરીરને જરૂરી ઊર્જા પૂરી પાડે છે અને પોષક તત્વોથી ભરપૂર છે.

બીટરૂટમાં આયર્ન, ફોલેટ, મેગ્નેશિયમ, પોટેશિયમ, ફાઇબર, વિટામિન C અને એન્ટીઓક્સિડન્ટ્સ જેવા અનેક પોષક તત્વો હોય છે. તે શરીરમાં લોહીની ઉણપ દૂર કરવામાં મદદ કરે છે, રોગપ્રતિકારક શક્તિને મજબૂત બનાવે છે અને ચહેરા પર કુદરતી તેજ લાવે છે.

બીટરૂટ ચીલા બનાવવા માટે જરૂરી સામગ્રી:

* 1 કપ ચણાનો લોટ
* 2 ટેબલસ્પૂન સોજી
* 1 મધ્યમ કદનું છીણેલું બીટરૂટ
* 1 સમારેલી ડુંગળી
* 1 લીલું મરચું (બારીક સમારેલું)
* 1 ટીસ્પૂન આદુની પેસ્ટ
* મીઠું સ્વાદ મુજબ
* લાલ મરચું પાવડર સ્વાદ મુજબ
* પાણી જરૂર મુજબ
* શેકવા માટે થોડું તેલ

બનાવવાની રીત:

એક મોટા વાસણમાં ચણાનો લોટ, સોજી અને છીણેલું બીટરૂટ લો. તેમાં સમારેલી ડુંગળી, લીલું મરચું, આદુની પેસ્ટ, મીઠું અને લાલ મરચું પાવડર ઉમેરો. હવે ધીમે ધીમે પાણી ઉમેરીને એક જાડું ખીરું તૈયાર કરો. ખીરાને 10-12 મિનિટ માટે આરામ કરવા મૂકી દો.

ત્યારબાદ નૉન-સ્ટીક તવો ગરમ કરો અને તેમાં થોડું તેલ લગાવો. તૈયાર ખીરાને તવા પર રેડી સમતલ રીતે પાથરી દો. બંને બાજુ સોનેરી અને ક્રિસ્પી થાય ત્યાં સુધી શેકો. ગરમાગરમ બીટરૂટ ચીલો લીલી ચટણી કે દહીં સાથે પીરસો.

આ ચીલો સ્વાદમાં મજેદાર છે, દેખાવમાં આકર્ષક અને આરોગ્ય માટે લાભદાયક છે. નિયમિત નાસ્તામાં તેને સામેલ કરવાથી શરીરને જરૂરી પોષણ મળે છે અને દિવસની શરૂઆત ઊર્જાથી ભરપૂર થાય છે.