સુરત : SBI બેંકમાં હથિયારધારી લૂંટારૂઓનો આતંક,કર્મચારીઓને બંધક બનાવી 50 લાખની લૂંટથી સનસનાટી મચી

• SBI બેંકમાં હથિયારધારી લૂંટારૂઓનો આતંક

• કર્મચારીઓને બંધક બનાવી 50 લાખની લૂંટ

• ધોળા દિવસે મોટી લૂંટની ઘટનાથી સનસનાટી મચી

• પોલીસ અધિકારીઓનો કાફલો તપાસમાં જોતરાયો

• સીસીટીવી ફૂટેજથી લૂંટારુઓની ઓળખ કરવાની કવાયત 

સુરતના વરાછા વિસ્તારમાં ધોળા દિવસે મોટી લૂંટની ઘટના સામે આવતા ભારે ચકચાર મચી ગઈ છે. સ્ટેટ બેંક ઓફ ઈન્ડિયાની શાખામાં ચાર હથિયારધારી લૂંટારુઓએ ઘૂસીને અંદાજે 50 લાખ રૂપિયાની લૂંટ ચલાવી હોવાની માહિતી પ્રાપ્ત થઈ છે.આ ઘટનાને પગલે પોલીસ દ્વારા તપાસ શરૂ કરવામાં આવી છે.

સુરતના વરાછા વિસ્તારમાં આવેલ સ્ટેટ બેંક ઓફ ઇન્ડિયાની શાખામાં બપોરના સમયે ચાર અજાણ્યા શખ્સો હથિયારો સાથે બેંકમાં ઘૂસી આવ્યા હતા. લૂંટારુઓએ બેંકમાં હાજર કર્મચારીઓને બંદૂકની અણીએ ડરાવી-ધમકાવીને બંધક બનાવી દીધા હતા. ત્યારબાદ લૂંટારુઓએ બેંકના સ્ટ્રોંગ રૂમ કે કેશ કાઉન્ટરમાંથી આશરે 50 લાખ રૂપિયાની રોકડ રકમની લૂંટ ચલાવી હતી. હથિયારોના જોરે લૂંટને અંજામ આપ્યા બાદ ચારેય શખ્સો ત્યાંથી ફરાર થઈ ગયા હતા.

ઘટનાની જાણ થતાં જ સ્થાનિક પોલીસ અને ઉચ્ચ અધિકારીઓનો કાફલો તાત્કાલિક ઘટના સ્થળે દોડી આવ્યો હતો. હાલ સમગ્ર વિસ્તારને કોર્ડન કરી લેવામાં આવ્યો છે અને બેંક તથા આસપાસના વિસ્તારોના સીસીટીવી ફૂટેજ મેળવી લૂંટારુઓની ઓળખ કરવાની કવાયત હાથ ધરવામાં આવી છે.પોલીસે શહેરભરમાં નાકાબંધી કરી લૂંટારુઓને પકડવા માટે ચક્રો ગતિમાન કર્યા છે.