BCCI દ્વારા વાર્ષિક એવોર્ડ કાર્યક્રમનું કરાયું આયોજન, શુભમન ગિલ ઈન્ટરનેશનલ ક્રિકેટર ઓફ ધ યર એવોર્ડથી કરાયું સન્માનિત
આજે ભારતીય ક્રિકેટરો માટે ખાસ દિવસ છે. હૈદરાબાદમાં ભારતીય ક્રિકેટ કંટ્રોલ બોર્ડ (BCCI)ના વાર્ષિક એવોર્ડ કાર્યક્રમનું આયોજન કરવામાં આવ્યું હતું. કોરોનાના કારણે આ સન્માન સમારોહ 2019 પછી પ્રથમ વખત યોજાઈ રહ્યો છે. આવી સ્થિતિમાં ત્રણેય વર્ષ માટે ખેલાડીઓનું અલગ-અલગ સન્માન કરવામાં આવ્યું હતું.
આ દરમિયાન પૂર્વ ભારતીય દિગ્ગજ રવિ શાસ્ત્રીને લાઈફટાઈમ અચીવમેન્ટ એવોર્ડ 2023થી સન્માનિત કરવામાં આવ્યા હતા. વર્તમાન ટીમના સ્ટાર ઓપનર શુભમન ગિલને વર્ષ 2022-23 માટે ઈન્ટરનેશનલ ક્રિકેટર ઓફ ધ યર એવોર્ડથી સન્માનિત કરવામાં આવ્યો હતો. 2021-22 માટે ઈન્ટરનેશનલ ક્રિકેટર ઓફ ધ યર એવોર્ડ ફાસ્ટ બોલર જસપ્રિત બુમરાહને આપવામાં આવ્યો હતો. ઉપરાંત BCCIએ 2019-20 માટે ફારુક એન્જિનિયરને કર્નલ સીકે નાયડુ લાઈફ ટાઈમ અચીવમેન્ટ એવોર્ડ આપ્યો છે.
તમને જણાવી દઈએ કે શુભમન ગિલ માટે વર્ષ 2023 ખૂબ જ શાનદાર રહ્યું છે. તે આ વર્ષે સૌથી સફળ ODI ક્રિકેટર પણ હતો. આ એક કેલેન્ડર વર્ષમાં ગીલે ODI ફોર્મેટમાં 5 સદી ફટકારી હતી. ઉપરાંત, આ જ વર્ષે, ગીલે ODIમાં સૌથી ઝડપી 2 હજાર રન બનાવવાનો રેકોર્ડ પણ બનાવ્યો હતો. ગિલ 2023માં કુલ 29 ODI મેચ રમ્યો, જેમાં તેણે 63.36ની શાનદાર એવરેજથી 1584 રન બનાવ્યા. આ દરમિયાન ગિલે 5 સદી અને 9 અડધી સદી ફટકારી હતી. આ વર્ષે ગિલનો વનડેમાં સર્વશ્રેષ્ઠ સ્કોર 208 રન છે. જ્યારે તેના પછી વિરાટ કોહલી (1377) અને રોહિત શર્મા (1255)નું નામ આવે છે. ત્રણેય ફોર્મેટમાં (ટેસ્ટ, ODI, T20), શુભમન ગિલ 2023માં કુલ 48 મેચ રમ્યો, જેમાં તેણે 46.54ની એવરેજથી 2154 રન બનાવ્યા. તેના પછી કોહલીનું નામ આવે છે જેણે 35 મેચમાં 66.06ની એવરેજથી 2048 રન બનાવ્યા હતા. બોલિંગ પર નજર કરીએ તો રવિન્દ્ર જાડેજાએ ત્રણેય ફોર્મેટમાં 35 મેચ રમી અને 66 વિકેટ લીધી. જ્યારે શમીએ 56 વિકેટ લીધી હતી.
