ઇમર્જિંગ એશિયા કપ ફાઇનલ : પાકિસ્તાને ફાઇનલમાં ભારતને 128 રનથી હરાવીને ઇમર્જિંગ એશિયા કપ ટ્રોફી જીતી

પાકિસ્તાને ઇમર્જિંગ એશિયા કપનો ખિતાબ જીતી લીધો છે. કોલંબોમાં રમાયેલી ફાઇનલમાં તેણે ભારતને 128 રનથી હરાવ્યું હતું. ભારતીય કેપ્ટન યશ ધુલે ટોસ જીતીને પ્રથમ બોલિંગ કરવાનો નિર્ણય કર્યો હતો. પ્રથમ બેટિંગ કરતા પાકિસ્તાને 50 ઓવરમાં 8 વિકેટ ગુમાવીને 352 રન બનાવ્યા હતા. તૈયબ તાહિરે 71 બોલમાં 108 રનની ઇનિંગ રમી હતી. જવાબમાં ભારતીય ટીમ 40 ઓવરમાં 224 રનમાં સમેટાઈ ગઈ હતી. અભિષેક શર્માને બાદ કરતા કોઈપણ ભારતીય બેટ્સમેન 50+ રન બનાવી શક્યા ન હતા. અભિષેકે 51 બોલમાં 61 રનની ઇનિંગ રમી હતી.

ઇમર્જિંગ એશિયા કપમાં પાકિસ્તાનનું આ સતત બીજું ટાઇટલ છે. અગાઉ આ ટૂર્નામેન્ટ 2019માં રમાઈ હતી. ત્યાર બાદ પાકિસ્તાને ફાઇનલમાં બાંગ્લાદેશને હરાવીને ટાઇટલ જીત્યું હતું. પાકિસ્તાન સતત બે વખત આ ખિતાબ જીતનારી બીજી ટીમ છે. તેની પહેલા શ્રીલંકાએ આવું કર્યું હતું. શ્રીલંકાએ 2017 અને 2018માં સતત બે વખત ઇમર્જિંગ એશિયા કપનો ખિતાબ જીત્યો હતો. આ ટૂર્નામેન્ટ 2013માં શરૂ થઈ હતી. પ્રથમ સંસ્કરણમાં, ભારતે સૂર્યકુમારની કપ્તાનીમાં ખિતાબ જીત્યો હતો. અત્યાર સુધીમાં કુલ પાંચ એડિશન રમાઈ ચુકી છે અને ટીમ ઈન્ડિયા માત્ર એક જ વાર જીતી શકી છે (2013). આ સાથે જ શ્રીલંકા અને પાકિસ્તાને બે-બે વખત ટાઈટલ જીત્યું છે. આ પહેલા 2018માં પણ ટીમ ઈન્ડિયા ફાઈનલમાં શ્રીલંકા સામે હારી ગઈ હતી.