IND vs AUS: ઓસ્ટ્રેલિયા સામેની મેચ માટે ટીમ ઈન્ડિયા તૈયાર, પૂજારા-કોહલી અને જાડેજાની પ્રેક્ટિસ શરૂ..!
ભારત અને ઓસ્ટ્રેલિયા વચ્ચે 9 ફેબ્રુઆરીથી ચાર ટેસ્ટ મેચની શ્રેણી શરૂ થશે. આ બોર્ડર-ગાવસ્કર ટ્રોફી ભારતીય ટીમ માટે ઘણી મહત્વની છે.
ભારત અને ઓસ્ટ્રેલિયા વચ્ચે 9 ફેબ્રુઆરીથી ચાર ટેસ્ટ મેચની શ્રેણી શરૂ થશે. આ બોર્ડર-ગાવસ્કર ટ્રોફી ભારતીય ટીમ માટે ઘણી મહત્વની છે. ભારતે વર્લ્ડ ટેસ્ટ ચેમ્પિયનશિપની ફાઇનલમાં પહોંચવા માટે આ સિરીઝ જીતવી પડશે. જો તે બે કે ત્રણ મેચ જીતી જશે તો તે સરળતાથી ફાઇનલમાં પહોંચી જશે. શ્રેણીની તૈયારી માટે ટીમ ઈન્ડિયા મેદાન પર ઉતરી છે. ભારતીય ટીમે નાગપુરમાં પ્રેક્ટિસ શરૂ કરી દીધી છે. અનુભવી બેટ્સમેન વિરાટ કોહલીની સાથે અનુભવી ચેતેશ્વર પૂજારા, ઓપનર કેએલ રાહુલ અને ઓલરાઉન્ડર રવિન્દ્ર જાડેજાએ પરસેવો પાડ્યો છે.
કોહલી માટે આ સિરીઝ ઘણી મહત્વની છે. બાંગ્લાદેશ સામેની છેલ્લી ટેસ્ટ સિરીઝમાં તે ખાસ કરી શક્યો નહોતો. વિરાટ અત્યારે શાનદાર ફોર્મમાં છે. તેણે ટી20 બાદ વનડેમાં જબરદસ્ત ઇનિંગ્સ રમી છે. હવે ચાહકોને તેની પાસેથી ટેસ્ટમાં મોટી ઇનિંગ્સની આશા છે. વિરાટ નવેમ્બર 2019થી ટેસ્ટમાં સદી ફટકારી શક્યો નથી. તે શ્રેણીમાં આ દુષ્કાળનો અંત લાવવા ઈચ્છશે.
ચેતેશ્વર પૂજારાની વાત કરીએ તો તે શાનદાર ફોર્મમાં ચાલી રહ્યો છે. તેણે બાંગ્લાદેશ પ્રવાસ પર સદી ફટકારી હતી અને 90 રનની ઇનિંગ રમી હતી. ઓસ્ટ્રેલિયા સામે પુજારાનો રેકોર્ડ પણ શાનદાર છે. તેણે કાંગારૂ ટીમ સામે 20 મેચની 37 ઇનિંગ્સમાં 1893 રન બનાવ્યા છે. આ દરમિયાન તેની એવરેજ 54.08 હતી. પૂજારાએ પાંચ સદી અને 10 અડધી સદી ફટકારી છે.
રવીન્દ્ર જાડેજા ઈજા બાદ વાપસી કરવાનો છે. તેણે રણજી ટ્રોફીમાં સૌરાષ્ટ્ર તરફથી રમીને પોતાની ફિટનેસ સાબિત કરી છે. જાડેજાના આગમનથી ટીમ મજબૂત થશે. તે ખતરનાક બોલિંગની સાથે ઉપયોગી બેટિંગથી પણ મોટું યોગદાન આપી શકે છે.
