ODI વર્લ્ડ કપ 2023 : દક્ષિણ આફ્રિકાએ બાંગ્લાદેશને 149 રને હરાવ્યું

ભારત દ્વારા આયોજિત ODI વર્લ્ડ કપ 2023માં મંગળવારે એક ખૂબ જ નીરસ મેચ રમાઈ હતી. આ મેચમાં દક્ષિણ આફ્રિકાની ટીમે 383 રનનો લક્ષ્યાંક આપ્યો હતો. જેના જવાબમાં બાંગ્લાદેશની આખી ટીમ 233 રનમાં સમેટાઈ ગઈ હતી. આ હાર સાથે બાંગ્લાદેશી ટીમ સેમીફાઈનલની રેસમાંથી લગભગ બહાર થઈ ગઈ છે. આ રીતે આફ્રિકાની ટીમે 149 રનના માર્જિનથી મેચ જીતી લીધી હતી. તમને જણાવી દઈએ કે 383 રનના ટાર્ગેટનો પીછો કરવા આવેલી બાંગ્લાદેશની ટીમ શરૂઆતથી જ સંઘર્ષ કરતી જોવા મળી હતી.તેણે 31 રનમાં 3 વિકેટ ગુમાવી દીધી હતી. ત્યાર બાદ 81 રનમાં 6 વિકેટ પડી ગઈ હતી. આ પછી મહમુદુલ્લાએ ઇનિંગ સંભાળી અને નસુમ અહેમદ સાથે 41 રનની ભાગીદારી કરી.

દક્ષિણ આફ્રિકાએ મંગળવારે 24 ઓક્ટોબરે ICC ODI વર્લ્ડ કપમાં વધુ એક શાનદાર જીત મેળવી. બાંગ્લાદેશ સામે ટોસ જીતીને બેટિંગ કરવાનું પસંદ કર્યા પછી, ટીમે ક્વિન્ટન ડી કોકની 174 રનની શાનદાર ઇનિંગ અને હેનરી ક્લાસેનના 90 રનના કારણે 5 વિકેટે 382 રનનો વિશાળ સ્કોર બનાવ્યો હતો. મહમુદુલ્લાએ બાંગ્લાદેશ માટે ચોક્કસપણે સદી ફટકારી હતી પરંતુ તેનાથી મેચના પરિણામ પર કોઈ ફરક પડ્યો ન હતો. બાંગ્લાદેશ 46.3 ઓવરમાં 233 રનમાં ઓલઆઉટ થઈ ગયું હતું. 149 રનની મોટી જીત સાથે દક્ષિણ આફ્રિકાએ ન્યૂઝીલેન્ડને પોઈન્ટ ટેબલમાં બીજા સ્થાને ધકેલી દીધું હતું.